धरान १५ का महिला हरेक कार्यमा सक्रिय "पञ्चेबाजा संरक्षणसँगै रक्तदान कार्यक्रमको आयोजना गरे"

धरान / साँस्कृतिक अभियानसँगै महिलाहरुलाई आत्मनिर्भर बनाउने उद्देश्यले खोलिएको महिलाहरुको समूह हातेमालो उद्यमी महिला समूह र प्रगतिशील नौमति तथा पञ्जेबाजा महिला समूहले धरानको लोकतान्त्रिक चौतारीमा वृहत रक्तदान कार्यक्रमको आयोजना गरेका छन् ।

उद्घाटनमा प्रमुख अतिथि बोलाएर रिविन काट्ने प्रचलन भएपनि महिलाहरुले भने पञ्चेबाजा बजाएर नाचगान गरेर रक्तदान कार्यक्रमको उद्घाटन गरेका थिए । महिला हरेक कुरामा सक्षम छन् भन्ने सन्देश दिन पनि रक्तदान कार्यक्रम गरेका उनीहरुले बताएका छन् ।

धरान २ भानुचौकको लोकतान्त्रिक चौतारी प्राय सबैको कार्यक्रम गर्ने थलोको रुपमा परिचित छ । यहाँ विभिन्न पार्टीका आमसभा, संघ संस्थाका विभिन्न कार्यक्रम, विरोधका कार्यक्रम दिनहुजसो हुने गरेको छ ।

यी मध्ये धेरैजसो यही ठाउँमा रक्तदान कार्यक्रम हुने गरेको छ । तर हरेक कार्यक्रम गर्दा प्रमुख अथितिले रिविन काटेर वा पानसमा बत्ती बाल्ने गर्ने प्रचलन छ तर पञ्चे बाजा संरक्षणमा जुटेका ती महिलाहरुले भने सामुहिक रुपमा पञ्चेबाजा वा नौमति बाजा बजाएर उद्घाटन गरेका थिए ।

महिलाहरु हरेक कुरामा सक्षम छन् भन्ने सन्देश दिन पनि धरानको मुटु भानुचौकमा रक्तदान कार्यक्रमको आयोजना गरिएको हातेमालो उद्यमी महिला र प्रगतिशील नौमति तथा पञ्जेबाजा महिला समूहकी अध्यक्ष लिला ढकालले बताइन्। उनले महिलाहरुलाई महिनैपिच्छे रजस्वला हुदा रक्तदान गर्दा अझ कमजोर हुइन्छ भन्ने भ्रम तोड्नलाई पनि यो कार्यक्रम राखिएको बताइन् ।

महिलाहरुलाई विभिन्न उद्योमी तालिम दिएर आत्मनिर्भर बनाउदै पञ्चे तथा नौमति बाजा संरक्षणमा जुटेका यी महिलाहरुले सामाजिक कार्यलाई पनि सँगै लिएर गएको प्रति अन्य महिलाहरुले समेत उनीहरुको कामप्रति प्रशंसा गरेका छन् ।

महिला सञ्जाल धरानकी पूर्व अध्यक्ष एवम् हातेमालो उद्यमी महिला र प्रगतिशील नौमति तथा पञ्जेबाजा महिला समूहकी सल्लाहकार शिला बज्राचार्यले यो समूहका महिलाहरुले गरेको कामको जति प्रशंसा गरे पनि नपुग्ने बताइन् ।

धरान उपमहानगरपालिकामा भएका हरेक कार्यक्रममा सहभागी भएर पञ्चेबाजा बजाउनेदेखि लिएर महिलाहरुलाई विभिन्न तालिम प्रदान गरेर आत्मनिर्भर बनाउने र पछिल्लो समय सामाजिक कार्यमा समेत सक्रिय भएको प्रति खुलेर प्रशंसा गरिन । उनँले महिला सञ्जाल धरानले उनीहरुको हरेक गतिविधिलाई सहयोग गर्दै आएको बताइन् ।

यस्तै धरान उपमहानगरपालिका वडा नं. १५ का वडाध्यक्ष नरेश इवारमले समेत आफ्नो वडामा समूह नै बनाएर संस्कृतिको जोगर्नासँगै महिलालाई आत्मनिर्भर बनाउने अभियान अगाडि बढाएको भन्दै उहाँहरुको काम अतुलनीय भएको बताए ।

यो समूहका लागेका महिलाहरु पछिल्लो समय हरेक कार्यमा सक्रिय छन् ।समाजमा महिलाले पनि केही न केही गर्नुपर्छ भन्ने उदाहरण यी महिलाहरुले पेश गरेका छन् ।