विजयपुर / नेवाः देय दबुले वर्षेनी आयोजना गर्दै आएको लाखे नाच प्रतियोगिता धरानमा सोमबार सम्पन्न भएको छ । धरानको भानु चोकमा भएको लाखे नृत्य प्रतियोगितामा झुम्काको रामधुनी नेवाः देय दवुको लाखे नाँच प्रथम भएको छ ।
त्यसै गरि मधुवन नेवाः देय दवु मधुवन दोस्रो भएको छ भने धरान ३ को झिगु लाखे तेस्रो र नेवाः देय दवु इटहरी वालग्राम चौथो भएको छ । प्रथम, दोस्रो, तेस्रो र चौथोलाई क्रमशः २५ हजार, १५ हजार, १० हजार र ५ हजार रुपैया पुरस्कार प्रदान गरिएको थियोे । प्रतियोगितामा झुम्का, मधुवन, धरान लगायत बराहक्षेत्र, चक्रघटिका १६ वडा लाखे समुह सहभागि भएका थिए ।
प्रतियोगिता कार्यक्रममा नेवारी समुदाय र गैरनेवारहरु उपस्थिति रहेको थियो । लाखे प्रतियोगितामा धरान बाहिरबाट ६ वटा र धरान भरिबाट १० लाखे समुह गरि १६ वडा लाखे समुहले नृत्य प्रतियोगितामा भाग लिएका थिए । कार्यक्रममा नेवारहरुको रितिरिवाज अनुसारको विभिन्न नृत्य समेत प्रस्तुती गरिएको थियो ।
कार्यक्रम प्रमुख अथिति धरान नगर प्रमुख हर्क साम्पाङ राई, बिषेश अथिति उप प्रमुख आईन्द्र विक्रम वेघा, प्रदेश सांसद यसोदा कायस्थ, नेवाः दवुका सल्लाहकार सरला कायस्थ, नेवाः दवुका नगर अध्यक्ष मनोहर शाक्य लगायतको उपस्थिति रहेको थियो । सामाजिक क्षेत्रमा योगदान पुर्याउने सरला कायस्थ र नेवार समुदायका अग्रज १ सय ३ बर्ष पुगेका ज्येष्ठ नागरिक तिर्थबाहादुर श्रेष्ठलाई सम्मान गरिएको छ ।