विजयपुर / वडावासीहरुलाई निशुल्क रगत उपलब्ध गराउन धरान उपमहानगरपालिका वडा नम्बर ९ ले नेपाल रेडक्रस सोसाइटी सुनसरी संग सम्झौता गरिएको छ ।
रेडक्रस र धरान वडा नम्बर ९ कार्यालय बीच निःशुल्क रगत उपलब्ध गराउनेबारे मंगलबार सम्झौता गरिएको छ । नेपाल रेडक्रसको ६१ औं स्थापना दिवसको अवसरमा आयोजना गरिएको कार्यक्रममा सम्झौता पत्रमा वडा नम्बर ९ का अध्यक्ष रुपेश आचार्य र रेडक्रसका सभापति उमेश थापाले हस्ताक्षर गरेका छन् ।
वीपी कोइराला स्वास्थ्य विज्ञान प्रतिष्ठानमा रहेको ब्लड बैंकमा रगतको विभिन्न परीक्षण, ब्लड ब्याग, ट्रान्सफ्युजन लगायत रगत आवश्यक हुँदा एक हजार पचास रुपैया शुल्क तिर्नु पर्ने हुन्छ । सम्झौता अनुसार रगतको आवश्यकता भएका विमारीहरु धरान वडा नम्बर ९ मा बसोबास गरेका तथा वडा बाटै मतदाता परिचयपत्र लिएको हुनुपर्ने छ।
वीपी कोइराला स्वास्थ्य विज्ञान प्रतिष्ठान लगायत अन्य अस्पतालमा उपचार गराइरहेका विरामीहरुलाई आवश्यक्ता अनुसार रेडक्रसले रगत उपलब्ध गराउने भएको छ । वडाले पनि बर्षमा एकपटक रक्तदान कार्यक्रम आयोजना गर्नुपर्ने सम्झौतामा उल्लेख गरिएको छ । रेडक्रस सभापति थापाको अध्यक्षतामा कार्यालयकै सभाहलमा कार्यक्रम सम्पन्न गरिएको थियो ।
कार्यक्रममा ईलाका प्रशासन कार्यालय धरानका प्रमुख अनुज कुमार घिमिरे, पुर्व सभापति टोमप्रसाद आचार्य, शिक्षक नायक भवानी खतिवडा, नेवाः देय दवुका सल्लाहकार सरला कायस्थ लगाएतको उपस्थिति रहेको थियोे ।