धरान/ यो बर्षको साउन महिना एक महिनाभरि मलमास रहेको छ ।
मलमासको प्रभाव धरान १४ विजयपुरमा रहेका मठमन्दिरमा परेको छ । मलमासका समयमा पूजाआजा गर्दा शुभ नहुने जनविश्वास रहेका कारण मठ मन्दिर सुनसान भएका हुन् ।
साउनको महिना बोलबमको महिना । अन्य बेला धरान १४ विजयपुरमा रहेका मठमन्दिर भरिभराउ हुन्थे ।
पूजाआजा गर्ने र बलि चढाउनेको लाइन त्यतिकै हुन्थ्यो तर यो बर्ष त्यस्तो छैन । मन्दिरहरु सुनसान छन् ।
सधै पूजाआजा र बली चढाउनेको भीड रहेको बुढासुब्बा मन्दिर यस बर्ष मलमास र साउनको समयमा बलि चढाउन बन्देज लगाएका कारण सुनसान देखिएको हो ।
मन्दिरका पूजारी पुष्प आलले मगरले बुढासुब्बा मन्दिरमा साउनभरि बलि नचढाउदा कम भक्तजन आउने गरेको बताउदै यस बर्ष त झन मलमास परेका कारण मन्दिर सुनसान भएको बताए ।
उनले साउन महिना एक महिना, सोह्र श्राद्धमा १६ दिन, एकादशी, औँशी, रामनवमी, कृष्ण अष्टमी, शिवरात्रीमा बुढासुब्बामा बलि नचढ्ने बताए ।
मलामासका समयमा फाट्टफुट्ट पूजाआजा गर्ने बाहेक बलि चढाउन आउनेको संख्या शून्य हुने गरेको उनको भनाई छ ।
विशेष गरेर बुढासुब्बामा मंगलबार र शनिवार बलि चढाउने र पूजाआजा गर्नेको संख्या अत्याधिक हुने गर्छ ।
यी दुई बार बलि चढाउँदा राम्रो फल प्राप्त हुने जनविश्वास रहि आएको छ ।
यो मन्दिरमा नेपाल लगायत भारतका विभिन्न स्थानबाट पूजाआजा तथा बलि चढाउन भक्तजनहरु आउने गरेका छन् ।
तर अहिले मन्दिर सुनसान हुँदा मन्दिरबाट आश्रित परिवारलाई समेत समस्या परेको छ । विशेष गरेर मन्दिरको प्रांगरणमा फूलमाला बेचेर जिविकोपार्जन गर्नेहरुलाई गुजारा चलाउन नै समस्या भएको छ ।
मन्दिरको प्रांगरणमा धेरै बर्षदेखि फूलमाला बेजेर गुजारा गर्दै आउनु भएकी सर्मिला क्षेत्रीले साउन महिना लागेदेखि भक्तजन कम आएको र विक्री कम भएको बताइन् ।
उनीँमात्र हैन मन्दिरको प्रांगरणमा फूलमाला बेचेर गुजारा चलाउने करिब २० वटा पसलको हालत यस्तै छ ।
विगत २५ बर्षदेखि बुढासुब्बा मन्दिर प्रांगरणमा फूलमाला व्यवसाय गर्दै आउनु भएका गणेश श्रेष्ठले आफूले व्यापार गरेदेखि अहिलेजस्तो सुनसान कहिल्यै नभएको बताए ।
अन्य बेला दैनिक दुई चार हजार विक्री भए पनि अहिले भने दुई चार सय मात्र विक्री हुने बताए ।
बुढासुब्बा मन्दिरमा मात्र दैनिक ४ देखि ५ हजार आउने सर्वसाधारण आउने गरेका छन् ।
मंगलबार र शनिवार अझ बढी भीडभाड हुने गरेको छ । सधै भरिभराउ विजयपुरका मन्दिरहरु साउन महिना भएपनि मलमासका कारण सुनसान छन् ।
मन्दिरमा सर्वसाधारण कम आउँदा मन्दिरबाट आश्रित परिवारलाई पनि समस्या भएको छ ।