धरान/ सुनसरीको इनरुवामा ९१५ किलोभन्दा बढी गाँजा सहित चार जना पक्राउ परेका छन्।
इनरुवा नगरपालिका–४ स्थित हनुमान मन्दिर नजिकै ज्ञानोदय टोलमा रहेको बुलबुल यादवको घरबाट प्रहरीले ९१५ किलो ६८० ग्राम गाँजा बरामद गरेको हो।
लागूऔषध गाँजा बिक्री वितरण भइरहेको विशेष सूचनाका आधारमा जिल्ला प्रहरी कार्यालय सुनसरीबाट खटिएको प्रहरी टोलीले आईतबार बिहान १ः३० बजे बुलबुल यादवको घरमा खानतलासी गरेको थियो।
सो क्रममा लुकाइछिपाइ राखिएको उक्त पदार्थ र प्र.१–०२–००१ प ९१९९ नम्बरको मोटरसाइकल फेला परेको प्रहरीले जनाएको छ।
पक्राउ पर्नेमा इनरुवा नगरपालिका–४ का ३६ वर्षीय बुलबुल यादव, २३ वर्षीय सन्तोष यादव, ३० वर्षीय आशिष यादव र दुहबी नगरपालिका–१० का २२ वर्षीय कुन्दन यादव रहेका छन्।
प्रहरीले बरामद पदार्थ र मोटरसाइकलसहित चारै जनालाई नियन्त्रणमा लिएर जिल्ला प्रहरी कार्यालय सुनसरीमा राखेको छ। घटनाबारे थप अनुसन्धान भइरहेको प्रहरीले जनाएको छ।
