झापा : झापा बुद्धशान्ति गाउँपालिका वडा नं. २ मा बसोबास गर्दै आएका गणेशप्रसाद निरौला र वहाँकी धर्मपत्नीलाई घरमै गएर पूर्व विद्यार्थीले सम्मान गरेका छन् । बालसुबोधिनी संस्कृत मा.वि. मेदिवुङ ताप्लेजुङमा अध्ययनरत पूर्व विद्यार्थीहररूको साझा मञ्च ‘पूर्व विद्यार्थी समाज बा.सु.सं.मा.वि.’ मेदिवुङ, ताप्लेजुङको आयोजनामा ‘जेष्ठ गुरु सम्मान’ गर्ने कार्यक्रम अनुसार पौष १० गते आइतबार सम्मान गरिएको हो । उनले बा.सु.सं.मावि ताप्लेजुङमा वि.सं. २०१९ सालदेखि अनवरतरुपमा ७ वर्षसम्म अध्यापन गरेका थिए ।
तत्कालीन फुङलिङ गाविस वडा नं. ३, बोझे ताप्लेजुङमा स्थायी बसोवास गरी वि.सं.२०२५ सालदेखि बुद्धशान्ति गाउँपालिका वडा नं–२, झापामा बसोवास गर्दै आएका गणेशप्रसाद र उनकी धर्मपत्नी समेतलाई उनीहरुकै निजी निवास पुगी समाजको तर्फबाट सहप्राध्यापक डा. रमेश घिमिरेले सुस्वास्थ्य एवं दीर्घ जीवनको कामनासहित दोसल्ला ओढाई सम्मानपत्रका साथ सम्मान गरिएको समाजका सहसचिव सागरमणि दाहालले बताए । कार्यक्रममा सम्मान मन्तव्य दुर्गाप्रसाद पौडेलले व्यक्त गरेका थिए भने कार्यक्रमको सञ्चालन समाजका सहसचिव दाहालले गरेका थिए ।