_1693980289.gif "#")
तस्विर: एम्बुलेन्समा नै नागरिकता दिँदै
इलाम / इलाममा पूर्ण अशक्त अपाङ्गता भएका व्यक्तिलाई एम्बुलेन्समा बोकेर ल्याई नागरिकता दिइएको छ ।
माई नगरपालिका ७ का शक्ति लावतीलाई जिल्ला प्रशासन कार्यालय इलामबाट नागरिकता दिइएको हो ।
प्रशासकीय अधिकृत हरि थापाले नागरिकता बनाउन आउँदा ल्याएको एम्बुलेन्समा नै आएर हातमा राखिदिएका थिए ।
प्रमुख जिल्ला अधिकारी श्रवणकुमार पोख्रेलले पूर्ण रूपमा अशक्त भएका र प्रशासन कार्यालयसम्म ल्याउन समस्या हुनेहरु पनि नागरिकताबाट वञ्चित हुनु हुँदैन भन्ने उद्देश्यले त्यस्तो कहीँ कतै भए सम्पर्कमा आउँदा आवश्यक प्रक्रिया पुरा गरी घरमै पुगेर पनि नागरिकता दिलाइदिने बताए ।
उनले आज जिल्ला प्रशासन कार्यालयमा ल्याएका व्यक्तिलाई पनि शनिवार घरमै गएर नागरिकता दिने तयारीमा रहेको बताए ।
बस्न समेत नसमाई नसक्ने उनलाई माई नगरपालिका वडा नं ७ का वडाध्यक्ष बुद्धि खनालको पहलमा नागरिकता बनाउन जिल्ला प्रशासन कार्यालय ल्याएको शक्ति लावतीका बुबा ललित लावतीले बताए ।
एम्बुलेन्सको बेडमा सुताएर ल्याएका शक्ति लावतीको नागरिकता बनेपश्चात् राष्ट्रिय परिचय पत्र पनि खिचिएको छ । माई नगरपालिका ७ का वडाध्यक्ष बुद्धि खनालले आफ्नो वडामा भएका र समस्या परेको सबैलाई सहयोग गर्ने बताए ।
उनले यो नागरिकता लागि मात्र नभई मुटु, किड्नी को समस्या भएका विरामी लागि अस्पताल सम्म नै पुगेर उपचारका लागि पनि सहयोग गरिरहेको बताए ।
२०६२ सालमा जन्मिएका शक्ति ओच्छ्यानमा नै सुतिरहने गर्दछन् । उनका हात खुट्टा चल्दैनन् र उनलाई एक्लैले बोकेर यता उता सार्न सकिँदैन ।
उनको रेखदेखका लागि परिवारको एक जनाले छोड्न नमिल्ने गरेको शक्तिकी आमा मनमाया लावती बताउछिन ।
