धरान/ पिण्डेश्वर विद्यापीठको अनुसन्धान व्यवस्थापन एकाइले ‘शोधसुधा’ जर्नलको प्रकाशन प्रारम्भ गरेको छ ।
विज्ञसमीक्षित बहुभाषिक अनुसन्धानात्मक जर्नलको पहिलो अङ्क बुधबार विमोचन भएको छ ।
प्रकाशित जर्नलका विषयमा प्राडा सागरमणि सुवेदी, उपप्राध्यापक डा जीवनकुमार राई र उपप्राध्यापक राजेश विद्रोहीले समीक्षा प्रस्तुत गरेका थिए ।
जर्नलमा संस्कृत भाषामा लेखिएका डा गुरुप्रसाद कोइराला, डा महानन्द तिमिल्सिना उपप्राध्यापक टीकाराम दाहाल, उपप्राध्यापक तुलसी पौडेल र दीपेन्द्र गौतमका लेखहरू समेटिएका छन्
भने डा रमेश घिमिरे, डा तुलसी गौतम, डा नित्यानन्द खतिवडा र सहप्राध्यापक अम्बरराज ढकालका नेपाली भाषाका लेखहरू समावेश छन् ।
यसै गरी अङ्ग्रेजी भाषामा लेखिएका डा दिवाकर रेग्मी, डा रमेश लिम्बू र उपप्राध्यापक कृष्णगोपाल अधिकारीका लेखहरू जर्नलमा सङ्कलित छन् । डा भवानीशङ्कर भट्टराईको प्रधान सम्पादकत्वमा जर्नल प्रकाशित भएको हो ।
विद्यापीठको कालिदास भवनमा आयोजित कार्यक्रममा विद्यापीठका प्राचार्य उपप्राध्यापक काशीनाथ पौडेलले अनुसन्धानबाट नै विश्वविद्यालय चिनिने भएको बताउँदै अब सबै प्राध्यापकहरू अनुसन्धान कार्यमा क्रियाशील हुनुपर्ने धारणा राखे ।
अनुसन्धान कार्यक्रमलाई प्रवद्र्धन गर्ने उद्देश्यले संस्कृत विश्वविद्यालयले हरेक विद्यापीठमा अनुसन्धान व्यवस्थापन एकाइ गठन गरेको छ ।
सो विद्यापीठको एकाइले विश्वविद्यालय अनुदान आयोगको सहयोगमा प्राध्यापन क्षमता विकास, अनुसन्धान प्रविधि तालिमजस्ता प्राज्ञिक कार्यक्रम सम्पन्न गरिसकेको एवम् लघुअनुसन्धान कार्यक्रमसमेत सञ्चालन गरिरहेको कार्यक्रमका अध्यक्ष एवम् अनुसन्धान एकाइका संयोजक डा महानन्द तिमिल्सिनाले जनाए ।
विमोचन कार्यक्रमको सञ्चालन एकाइका सचिव डा रमेश लिम्बूले गरेका थिए ।