_1693980289.gif "#")
धरान /स्थानीय सरकारले पछिल्लो समय महिला लक्षित कार्यक्रमहरुलाई प्राथमिकतामा राखेर अगाडि बढाउन थालेका छन् ।
महिला लक्षित बजेटबाट उनीहरुलाई विभिन्न सीपमुलक तालिम दिँदै आएको हो ।
घरेलु उद्योगलाई प्रोत्साहित गर्दै महिलालाई आत्मनिर्भर बनाउन धरान उपमहानगरपालिका वडा नं. १७ ले शनिवार एक दिने साबुन बनाउने तालिम दिएको हो ।
धरान उपमहानगरपालिका वडा नंं ११ का वडाध्यक्ष लोकेन्द्र फागोले तीतेपातीमा पानी हालेर तालिमको उद्घाटन गरेका थिए ।
समृद्धि प्राकृतिक साबुन उद्योगकी सञ्चालक मनिता घिमिरेले वडामा रहेका २५ जना महिलाहरुलाई तालिम दिएकी थिइन् ।
संगम महिला समूहको सहकार्यमा आयोजना भएको सो तालिममा महिलालाई घरेलु उद्योगमा प्रोत्साहित गरी आत्मनिर्भर बनाउन तालिमको आयोजना गरिएको वडा नं. १७ का कार्यवाहक अध्यक्ष लक्ष्मण राईले बताए ।
संगम महिला समूहकी अध्यक्ष पूजा विमली सुवेदीले महिलाहरुका लागि साबुन बनाउने तालिम अत्यन्तै लाभदायिक भएको बताइन् ।
घरमै बसेर प्राकृतिक रुपमा पाइने जडिबुटीबाट बनाउन सकिने यो तालिमले महिलाहरुलाई उद्योगी बनाउन सहयोग पुग्ने बताइन् ।
तालिमको सहजीकरण गरेकी सृम्बृद्धि प्राकृतिक सावुन उद्योगकी सञ्चालक मनिता घिमिरेले प्राकृतिक सावुन उत्पादनबाट धेरै सम्भावना भएको बताइन् ।
उनले गाउँघरमा पाइने निम, तीते पाती, चारकोलबाट नुहाउने साबुन बनाउन सकिने भएकोले स्वरोजगार बन्नका लागि महिलाहरुलाई अन्यत्र भौतारिन नपर्ने बताइन् ।
केही समय अगाडि उनले उदयपुर जिल्लाको गढी गाउँपालिकामा समेत पाँचदिने सावुन बनाउने तालिम दिएकी थिइन् । तालिममा गढी गाउँपालिकाका १० जना महिलाको सहभागिता रहेको थियो ।
यस्तै प्रकृतिको तालिम धरान १६ ले समेत गरेको थियो । महिला लक्षित बजेटबाट मखमलीको जुत्ता बनाउने तालिम दिएको थियो ।
स्थानीय तहले महिलालाई आत्मनिर्भर बनाउन दिने गरेको यस्ता तालिम प्रभावकारी भएको तालिममा सहभागी महिलाहरुले समेत बताएका छन् ।
