बिराटनगर / सुनसरी र ईलामका दुई छुट्टाछुट्टै स्थानबाट बुधवार साँझ लागूऔषध ब्राउन सुगर सहित ४ जनालाई प्रहरीले पक्राउ गरेको छ । पक्राउ पर्नेमा धरान उप महानगरपालिका वडा नम्बर १७ का ३४ बर्षीय मनिष पाण्डे, धरान वडा नम्बर ११ का ३५ बर्षीय सुर्य कुमार राई,झापा गौरिगंजकी ३२ बर्षीया बबिता राजवंशी र दमक नगरपालिका वडा नम्बर २ का ४१ बर्षीय राजकुमार बिश्वकर्मा रहेका छन् ।
पाण्डे र राईलाई ईलाका प्रहरी कार्यालय महेन्द्रनगरबाट खटिएको प्रहरी टोलीले सुनसरीको बराहक्षेत्र नगरपालिका वडा नम्बर ८ बाट ११ ग्राम ३७० मिलिग्राम लागुऔषध ब्राउनसुगर सहित पक्राउ गरेको हो ।
प्रदेश १–०२–०४२ प ८४०३ नम्बरको स्कुटरमा शुक्रवारेको भित्री सडक खण्ड बाट दक्षिणबाट दिशा उत्तर दिशा तर्फ आँउदै गर्दा उनीहरुलाई चेकजाँच गर्ने क्रममा उनीहरुको साथबाट लागुऔषध बरामद गरिएको हो ।
उनिहरु दुबै जनालाई पक्राउ गरी थप अनुसन्धान भईरहेको उक्त कार्यालयले जनाएको छ । यसैगरी प्रहरी चौकी पेल्टिमारीबाट खटिएको प्रहरीटोलीले ईलामको चुलाचुली गाउँपालिका वडा नम्बर २ बाट राजवंशी र बिश्वकर्मालाई ०.४६ मिलिग्राम लागुऔषध सहित पक्राउ गरेको छ ।
मे १–ह– ३२२० नम्बरको अटोलाई चेकजाँच गर्ने क्रममा अटोमा सवार रहेका उनीहरुको साथबाट लागुऔषध बरामद भएको र दुबै जनालाई पक्राउ गरी थप अनुसन्धान भईरहेको जिल्ला प्रहरी कार्यालय ईलामले जनाएको छ ।