_1693980289.gif "#")
दुहबी/ सुनसरीको दुहबीमा ३ दिने व्यक्तित्व विकास तथा उद्घोषण तालिम सम्पन्न भएको छ ।
न्यूज ट्रयाक साप्ताहिकको आयोजना तथा दुहबी नगरपालिका वडा नम्बर ५ को सहयोगमा सरस्वति माध्यमिक विद्यालयको हलमा महिलाहरुलाई ३ दिने व्यक्तित्व विकास तथा उद्घोषण तालिम दिइएको हो ।
तालिमको समापनमा ५ नम्बर वडाका वडाअध्यक्ष रमेश कुमार रौनियारले राम्रो काम गर्दा अनावश्यक अवरोध सृजना गर्न खोजे पनि आफू वडाबासीको हीतमा सधैं समर्पित हुने बताए ।
उनले व्यक्तित्व विकास तथा उद्घोषण तालिम क्रियाशील मानिसको जीवनमा अत्यन्त्यै महत्वपूर्ण तालिम भएको बताउंदै तालिम प्राप्त गरेर सबैले आफ्नो जीवनमा उपयोग गर्नेमा बिश्वास व्यक्त गरे । साथै यो तालिमलाई अझै धेरै दिनको संचालन गर्न वडा कार्यालय तयार रहेको बताए ।
कार्यक्रममा दुहबी नगरपालिका कार्यपालिका सदस्य मिना श्रेष्ठले सहभागीहरुको प्रस्तुति हेर्दा तथा अनुभव सुन्दा तालिम प्रभावकारी रहेको बताइन ।
कार्यक्रममा न्यूज ट्रयाक साप्ताहिकका प्रधान सम्पादक तथा प्रकाशक महेश प्रसाद गुरागाईले सहभागीका अनुभव, सक्रियता तथा उत्साहले तालिम सफल भएको प्रमाणित भएको बताउदै सहभागीहरुले जीवनसंग सिकाइलाई जोडेर लगेमा मात्र यसको उपलब्धि हुनेमा जोड दिए ।
समापन कार्यक्रममा सहभागीहरुले तालिम उपलब्धिमूलक भएको बताउदै अझै धेरै दिनको तालिम संचालन गर्न माग गरेका थिए ।
कार्यक्रममा प्रशिक्षक मेघराज न्यौपाने, सरस्वति माविका प्रधानाध्यापक तेज प्रसाद तिम्सिना लगायतले सहभागिहरुलाई सिकेका कुरा व्यबहारमा लागू गर्न प्रयत्न गर्नु पर्नेमा जोड दिए ।
कार्यक्रम संयोजक चन्दन कुमार रौनियारले वडा कार्यालयसँग भएको सहमति भन्दा बढी सहभागी भएको जानकारी दिए । उनले सिक्न चाहेर आउनेलाई फर्काउनु भन्दा सहभागीता गराउनु उपयुक्त ठानी तालिममा सहभागिता गराइएको बताए ।
पुष २ गतेबाट शुरु भएको तालिममा ५ नम्बर वडाका विभिन्न सरकारी तथा गैह्र सरकारी संघ संस्थामा कार्यरत तथा गृहिणी एबम सामाजिक अभियान्ताहरु गरी ८५ जना महिलाहरुको सहभागीता रहेको थियो ।
