धरान/ सामान्य विवादका कारण धरान १७ का अजितमान विकले ठूलो क्षति व्यहोर्नु परेको छ ।
सामान्य विवादमै उनलाई मट्टितेल छर्केर आगो लगाइएको थियो ।
धरान १७ मा भएको सो घट्नाबाट घाइते भएका उनको अहिले धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको छ ।
घटनामा संलग्न दुई जनालाई प्रहरीले नियन्त्रणमा लिएर अनुसन्धान गरिरहेको इलाका प्रहरी कार्यालय धरानका डिएसपी नवराज मल्लले जानकारी दिए ।
खहेर्दा सामान्य जलेको जस्तो देखिए पनि बिपी प्रतिष्ठान ‘बर्न हस्पिटल’ नभएका कारण उनको अवश्था चिन्ताजनक रहेको छ ।
गत भदौ १३ गते बुधबार धरान १७ का ४१ वर्षीय अजितमान बिकलाई सोही स्थान बस्ने जङ्गे कुमाल भनिने जंगबहादुर राई र उनकी श्रीमती जयकुमारी राईले मट्टितेल छर्केर आगो लगाएको आरोपमा प्रहरीले उनीहरुलाई पक्राउ गरी अनुसन्धान शुरु गरको छ ।
दुबैलाई प्रहरीले सोही दिन नियन्त्रणमा लिई अनुसन्धान थालिएको डिएसपी मल्लले जानकारी दिए ।
धरान १७ कै एक पसलमा खानपिन गरिरहेको बेला जंगबहादुर र उनकी श्रीमती जयकुमारीले मट्टितेल खन्याएर आगो लगाएको पीडित बिकले बताए ।
पीडित बिकको अनुहार, छाती, पेट, तथा हात जल्दा उनी गम्भीर घाइते भएका छन् ।
उनको हाल बिपी कोइराला स्वास्थ विज्ञान प्रतिष्ठानस्थित सर्जरी २ को आइसोलेसन वार्डको बेड न १ मा उपचार भइरहेको छ । यस विषयमा थप अनुसन्धान भइरहेको डिएसपी मल्लले जानकारी दिए ।
