धूम्रपान र मद्यपान लतका कारण बिरामी बढे: डा. प्रशान्त शाह

धरान / परिवर्तनका लागि सामाजिक अभियानले संचालन गरेको जनचेतना कार्यक्रममा धुम्रपान र मद्यपानको लतका कारण धेरै बिरामीहरु हुने गरेको पाइएको छ ।

हरेक १४ दिनमा आयोजना हुने सामाजिक स्वास्थ्य क्लिनिकका चिकित्सक डा.प्रशान्त शाहका अनुसार बिरामीहरुलाई धुम्रपान र मद्यपानको कुलत नै समस्या भएको र आहार बिहारमा ध्यान पुर्याउनु पर्ने आवस्यकता रहेको छ ।

अभियानद्वारा आयोजित सामाजिक स्वास्थ्य क्लिनिकको ३९ औं संस्करणमा वरिष्ट मुटु रोग विशेषज्ञ डा. शाहले मुटु, उच्च रक्तचाप र मधुमेह सम्बन्धि परिक्षण गरेका छन् ।

धरान १६ स्थित जोरसखुवा भुल्के बुवा समुहको सहकार्यमा आयोजित उक्त क्लिनिकमा १ सय २ जना बिरामीहरुको स्वास्थ्य परिक्षण गरिएको परिवर्तनका लागि सामाजिक अभियानका अध्यक्ष विष्णु बरालले बताए ।

बरालका अनुसार यो कार्यक्रम विशेष गरि ७० वर्षभन्दा बढी उमेरका जेष्ठ नागरिकका लागि आयोजना गरिएको हो ।

सामाजिक अभियानमा अभियन्ताहरु मोहन श्रेष्ठ, भोजराज श्रेष्ठ, वर्षा अग्रवाल, हेमचन्द्र ढकाल, निशान नेपाल, राजु फुँयाल लगायतको सहभागिता रहेको थियो ।
त्रिभुवन बरालको संयोजकत्वमा सम्पन्न कार्यक्रममा स्टाफ नर्स रमला गुरागाईले रक्तचाप परिक्षण गरेकी थिईन ।

क्लिनिकमा निःशुल्क मधुमेह परिक्षण र निःशुल्क औषधी वितरण समेत गरिएको थियो ।

सुनसरी उद्योग वाणिज्य संघका पूर्व अध्यक्ष विजय डाँगाले घरआँगनमै सहजता साथ स्वास्थ्य परिक्षण गर्न पाएकोमा खुशी व्यक्त गर्दै अभियानप्रति आभार प्रकट गरेका थिए ।