धरान । मजदुर क्षेत्रबाट राजनीतिमा सक्रिय रहेर भर्खरै सम्पन्न धरान उपपमहानगर कमिटीको निर्वाचनमा निर्वाचित १२ जना श्रमिकलाई नेपाल ट्रेड युनियन महासंघ (जिफन्ट) धरान नगर कमिटीले सम्मान गरेको छ ।
बैशाख ५ र ६ गते सम्पन्न नेकपा एमाले धरानको प्रथम अधिवेशनबाट नगर सदस्यमा निर्वाचित भएका १२ जना श्रमिकलाई शुक्रबार सम्मान गरिएको हो । सम्मानित हुनेहरुमा यातायात क्षेत्रका कमल भट्टराई, धनबहादुर राई, विवेक राई, आननकुमार राई, दिपककुमार श्रेष्ठ बनेपाली र दिनेश कोइराला रहेका छन् ।
त्यस्तै सुरक्षा क्षेत्रबाट गोपीनाथ योगी, रत्न नेम्वाङ र प्रविण राई रहेका छन् । त्यसैगरी निर्माण क्षेत्रबाट अब्बास अन्सारी र लोककुमारी श्रेष्ठ रहेका छन् । स्वास्थ्य स्वयम्सेवी क्षेत्रबाट विजयकला राई रहेका छन् ।
सम्मान कार्यक्रममा नेपाल यातायात स्वतन्त्र मजदुर संगठनका केन्द्रीय अध्यक्ष भीमज्वाला राईले ८३ सदस्यीय नगर कमिटीमा १२ जना मजदुरहरुको प्रतिनिधित्व एमाले नगर कमिटीमा रहेको बताएका थिए । जिफन्ट राष्ट्रिय कमिटी सदस्य समेत रहेका राईले सर्वहारा श्रमजीवी वर्गको हित बाहेक कम्युनिष्ट पार्टीको अर्को कुनै स्वार्थ नहुने बताउदै कम्युनिष्ट घोषणापत्रको मर्म अनुसार पार्टीमा काम गर्न सुझाव दिएका थिए । उनले मजदुरहरुको एजेण्डामा पार्टीलाई अझ प्रभावकारी बनाउन आग्रह गरे ।
सम्मानितहरुको तर्फबाट धरान १० का वडा अध्यक्ष समेत रहेका विवेक राईले जिफन्टको मार्गनिर्देश अनुसार काम गर्दै राजनीतिमा होमिएको बताएका थिए उनले आफु मजदुर सेक्टरबाट राजनीतिमा प्रवेश गरेकोमा गर्व लागेको बताए ।
कार्यक्रममा क्यूपेक नेपालका उपमहासचिव मुक्तिनाथ गिरी, अटोमेकानिक्स टे«ेड युनियनका प्रतिनिधि परिषण् उपप्रमुख रङ्गलाल गिरी, नेकपा (एमाले) धरान नगर अध्यक्ष हर्कजंग एभेङ लगायतले बधाई मन्तव्य व्यक्त गर्नुभएको थियो । जिफन्ट नगर अध्यक्ष शमशेर बर्देवाको अध्यक्षता रहेको कार्यक्रमको सञ्चालन सचिव डम्बर अधिकारीले र स्वागत मन्तव्य विकेश श्रेष्ठले गरेका थिए ।