_1693980289.gif "#")
दुहबी / सुनसरीको दुहबीमा न्यायमा पहुँच पुर्याउने उदेश्यले दुहबी नगरपालिकाले निःशुल्क हटलाइन सेवा बिस्तार गरेको छ ।
बिदाको दिन बाहेक आइतबारदेखि बिहीबार बिहान १० बजे देखि बेलुकी ५ बजे सम्म र शुक्रबार बिहान १० बजे देखि दिउँसो ३ बजे सम्म निःशुल्क हटलाइन सेवा सञ्चालनमा रहने जनाइएको छ ।
महिला, बालबालिका, अशक्त असहाय तथा ज्येष्ठ नागरिकहरु लगायतको न्यायमा पहुँच र घरेलु हिंसा न्यूनीकरणका लागि निःशुल्क हटलाइन टेलीफोन नम्बर (१६६०२५५८८९५) जारी गरिएको छ । दुहबी नगर प्रमुख बेदनारायण गच्छदारले निःशुल्क हटलाइन सेवाको समुद्घाटन गर्दै द्रुत गतिमा न्यायमा पहुँच पुर्याउन निःशुल्क हटलाइन सेवा शुरु गरेको बताए ।
उनले यो सेवाबाट दुहबीवासी प्रत्यक्ष लाभान्वित हुने विश्वास व्यक्त गर्दै दिगो विकासका लागि स्थानीय तहलाई अधिकार सम्पन्न बनाउनुपर्नेमा जोड दिए ।
निःशुल्क हटलाइन नम्बरमा फोन गरेर दुहबीको सवै खाले समस्याहरुको सम्बन्धित शाखामा जानकारी दिन सकिने मेयर गच्छदारले जनाए ।
दुहबी नगर उपप्रमुख मेनुका पोखरेल खतिवडाले चुनावमा दुहबीका नागरिकसंग गरेको वाचाको संकल्प अनुसार निःशुल्क हटलाइन सेवा विस्तार गरेको जानकारी दिइन् । उनले हिंसा पीडित नागरिकलाई राहत तथा क्षतिपूर्तिको व्यवस्था गरिरहेको बताइन् ।
न्यायिक समिति कानुन तथा मानव अधिकार प्रवर्धन शाखा दुहबीको आयोजनामा बुधबार भएको पत्रकार सम्मेलन मार्फत निःशुल्क हटलाइन सेवाबारे जानकारी गराइएको थियो ।
पत्रकार सम्मेलनमा दुहबीका १ देखि १२ वडाअध्यक्षहरु प्रमुख प्रशासकीय अधिकृत राजकुमार केसी, सुरक्षाकर्मी, सञ्चारकर्मी, कर्मचारीहरु लगायतको उल्लेखनीय सहभागिता रहेको थियो ।
