राष्ट्रिय वक्तृत्वकला प्रतियोगितामा आइडियल बोर्डिङका सुवेदी तेस्रो

धरान /  नेपाली सेनाद्वारा सञ्चालित राष्ट्रिय सेवा दलले काठमाडौँमा आयोजना गरेको राष्ट्रिय वक्तृत्वकला प्रतियोगितामा धरानको आइडियल बोर्डिङ स्कुलका छात्र सम्पन्न सुवेदी तेस्रो भएका छन् ।

नेपाली सेनाको २६० औँ स्थापना दिवसको अवसरमा केही दिनअघि सैनिक मुख्यालयमा आयोजित प्रतियोगितामा सुवेदी तेस्रो भएका हुन् । यसअघि मोरङको याङ्सिलास्थित पूर्वी तालिम शिक्षालयमा भएको प्रदेशव्यापी वक्तृत्वकला  प्रतियोगितामा उनी दोस्रो भएका थिए ।

देशभर रहेका नेपाली सेनाका चारवटा शिक्षालयबाट लगभग २५ हजार विद्यार्थी प्रतियोगितामा सहभागी थिए । तीमध्ये उत्कृष्ट १२ जना अन्तिम प्रतिष्पर्धाका लागि छानिएर काठमाडौँ पुगेका थिए । देशको हरेक शिक्षालयबाट ३/३ जना विद्यार्थी अन्तिम प्रतिष्पर्धाका लागि छानिएका थिए ।

प्रधानसेनापति प्रभुराम शर्माले विजेताहरूलाई प्रमाणपत्रसहिहत नगद पुरस्कार प्रदान गरेका थिए । प्रतियोगिताका कारण देशका विभिन्न भागबाट आएका विद्यार्थीहरूसँग चिनजान गर्न पाउँदा धेरै खुशी लागेको सुवेदीले सुनाए । ‘फरक फरक स्थान, विभिन्न भाषा, धर्म–संस्कार भएका साथीहरूसँगको भेटघाट र कुराकानीले नयाँ अनुभूति भएको छ ।’

उनले भने । त्यसमा पनि प्रधानसेनापतिबाट पुरस्कार प्राप्त गर्नु आफ्ना लागि जीवनकै ठूलो हौसला र उपलब्धि भएको उनको भनाइ छ । राष्ट्रिय स्तरको वक्तृत्वकला  प्रतियोगितामा आफ्नो विद्यालयका विद्यार्थी तेस्रो हुनु आइडियल स्कुलका लागि मात्र नभएर समग्र धरानकै लागि गौरवको विषय भएको स्कुलका निर्देशक सागर खड्काले बताए ।