धरान मोडल कलेजको खेल सप्ताह सुरु दौड प्रतियोगितामा प्रभात र सिर्जना प्रथम

धरान/धरान मोडल कलेजको सप्ताहव्यापी खेलकुद कार्यक्रम सुरु भएको छ । आइतबार छोटो दौड प्रतियोगिताको आयोजना गरी खेल सप्ताह सुरु गरेको हो ।

धरान १ मा रहेको कलेजले विगतका वर्ष झैँ यस वर्ष पनि खेलकुद सप्ताह सुरु गरेको हो । खेलकुद सप्ताह उद्घाटन कार्यक्रमका प्रमुख अतिथि धरान उपमहानगरपालिकाका उपप्रमुख अइन्द्रविक्रम बेघाले धरानको भानु चौकमा आयोजित दौड प्रतियोगितालाई रिवन काटेर सुरु गर्दै खेल सप्ताहको उद्घाटन गरेका थिए। कार्यक्रममा बोल्दै बेघाले भने : यसले धरानलाई खेलकुदको सहरका रुपमा परिचित बनाउन मद्दत गर्नेछ। यस्ता कार्यक्रमको आयोजना गरिरहने मोडल कलेजलाई धन्यवाद दिए । 

उद्घाटन कार्यक्रममा धरान रनका संयोजक रमु राई, ट्राफिक प्रहरीका असई नारद प्रसाद दाहाल, कलेजका प्राचार्य प्रविन राई, प्राध्यापक, समाजसेवी, पत्रकार, विद्यार्थी, सुरक्षा प्रमुख प्रतिनिधिहरुको उपस्थिति रहेको थियो। कार्यक्रमको सञ्चालन कलेजका प्राध्यापक एवम् दौड प्रतियोगिताका संयोजक भवानी शंकर भट्टराईले गरेका थिए ।

खेल सप्ताहको पहिलो दिन भएको दौड प्रतियोगितामा छात्रातर्फबाट तीन किलो मिटर दौडमा कलेकी छात्रा सिर्जना राई, अस्मिता राई, स्वस्तिका खड्का क्रमश: प्रथम, द्वितीय र तृतीय भएका थिए । त्यसै गरी छात्रातर्फको पाँच किलोमिटर दौडमा कलेजका छात्रहरु प्रभात राई, साङ्गे शेर्पा, छविलाल बुढाथोकी क्रमश: प्रथम, द्वितीय र तृतीय भएका थिए । प्रतियोगितामा छात्राछात्र गरेर जम्मा पचासजना विद्यार्थीले भाग लिएका थिए ।

सप्ताहव्यापी कार्यक्रममा फुटसल, चेस, क्यारेमबोड, चाइनिज चेकर, हाजिरीजवाफ प्रतियोगिता, कविता लेखन तथा वाचन प्रतियोगिता, वक्तृत्वकला प्रतियोगिता, सरसफाई, टेबलटेनिस, नृत्य तथा गायन प्रतियोगिता, रक्तदान जस्ता बहुविधा प्रतियोगिता रहेको सप्ताहव्यापी कार्यक्रमका मूल संयोजक विष्णु खनालले बताए । २८ गते सम्म प्रतियोगिता हुने र २९ गते समापन हुने पनि उनले बताए ।