_1693980289.gif "#")
धनकुटा/ आर्थिक संकटका कारण कच्चा पदार्थ अभाव भएपछि धनकुटामा रहेको एक मात्रै ठुलो उद्योग निगाले सिमेन्ट उद्योग बन्द भएको छ ।
धनकुटाको छथर जोरपाटी गाउँपालिका वडा नम्बर ६ सिधुवाँमा रहेको सिमेन्ट उद्योग बन्द भएको हो ।
दैनिक छ हजार बोरा सिमेन्ट उत्पादन गर्ने क्षमता रहेको यो उद्योगले पछिल्लो समय तीन हजार बोरा मात्रै सिमेन्ट उत्पादन गर्दै आएको थियो । उत्पादन ठप्प भएपछि उद्योगका १ सय ५० जना भन्दा बढी कर्मचारी बेरोजगार बनेका छन् ।
आर्थिक संकटकै कारण उद्योगले दैनिक लाखौँ रुपियाँ घाटासमेत बेहोर्नुपरेको परेको छ ।
उद्योग गलत ठाउँमा खुलेका कारण सुरुवातदेखि नै चिसोका कारणका तीन सय टन उत्पादन क्षमता रहेको उद्योगले दैनिक एक सय ५० टन मात्रै उत्पादन गर्दै आएको कर्मचारी सरोज सेढाइँले जानकारी दिनुभयो ।
कोभिडले थला पारेपछि सुरु भएको आर्थिक मन्दीका कारण भारतको विभिन्न क्षेत्रबाट आउने कोइला, बक्साइट, लेटराइट, जिप्समलगायतको कच्चा पदार्थको मूल्य अत्यधिक बढ्नु र सिमेन्ट बिक्री ठप्प हुँदा उद्योग बन्द भएको हो ।
उद्योग सञ्चालन हुँदा कोशी पहाडी जिल्ला धनकुटा, तेह्रथुम, भोजपुर तथा संखुवासभाको सिमेन्टको ८० प्रतिशत माग धान्दै आएको थियो ।
यता उद्योगले जरिवाना बाहेक १४ करोड १८ लाख ३३ हजार ९ सय १० रुपियाँ विद्युत महसुल तिर्न बाँकी रहेपछि विद्युत प्राधिकरण धनकुटाले लाइन काटेको छ ।
धनकुटामा निगाले सिमेन्ट सहित साना र मझौला उद्योग आर्थिक संकटको कारण धमाधम बन्द भइरहेको र सञ्चालनको लागि तीनै तहको सरकारले पहल गर्नुपर्ने धनकुटा उद्योग वाणिज्य संघका अध्यक्ष विजयसन्तोषी राईले बताए ।
