धरान/ बीपी कोइराला स्वास्थ्य विज्ञान प्रतिष्ठान दक्षिण एसियाकै उत्कृष्ट अस्पतालको रुपमा चिनिन्छ । यहाँ नेपालका विभिन्न स्थान तथा भारतबाट समेत उपचारका लागि आउने गर्छन् ।
तर अस्पताल जस्तो संवेदनशील क्षेत्रमा दिनहुँ हुने ट्राफिक जामले विरामीहरु मारमा पर्ने गरेका छन् । असहज अवस्था भएको प्रतिष्ठानको बाटो खाली गर्ने काम शुरु गरिएको छ ।
अस्पतालमा सवारी आवागमन सहज रुपमा हुनुपर्छ ।
अस्पतालमा साधारण विरामीदेखि सिकिस्त विरामीहरु उपचारका लागि आउने गर्छन् ।
अस्पतालसम्म पुग्ने बाटो जाम हुदा विरामी बोकेको एम्बुलेन्स तथा सवारी साधन समयमै पुग्दैन र विरामीको ज्यान समेत जोखिममा पर्ने गर्छ ।
यसैलाई मध्यनजर गरी स्थानीय सरकार र जिल्ला ट्राफिक प्रहरी कार्यालय सुनसरीले प्रतिष्ठान आसपासमा रहेका जथाभावी पार्किङ, फास्टफुडका ठेलागाडीलाई हटाउन थालेको हो ।
अस्पतालजस्तोे संवेदनशील क्षेत्रमा सम्बन्धित पक्षले ध्यान नदिएपछि स्थानीयले सम्बन्धित पक्षसँग गुनासो गरेका थिए । सर्वसाधारणको गुनासो आए पछि यातायात व्यवसायीहरु पनि प्रतिष्ठान परिषरको सडक खुलाउने विषयमा सकारात्मक देखिएका छन् ।
घोपा यातायात प्रा.लिका उपाध्यक्ष नेत्र वाग्लेले सबैलाई सहज बनाउन जाम हटाउन आवश्यक रहेको र यसका लागि आफूले सघाउने बताए ।
जिल्ला ट्राफिक प्रहरी कार्यालय सुनसरी र धरान उपमहानगरपालिकाको संयुक्त प्रयासमा अस्पताल क्षेत्रमा ट्राफिक हुन नदिन प्रतिष्ठान क्षेत्रमा पर्ने भित्र र बाहिरका सडकहरुको खुल्ला गर्न थालिएको छ ।
सडक जाम हटाउने कामसँगै बषौदेखि हेलमेट नलाई सवारी साधन चलाउने चिकित्सकहरुलाई समेत अनिवार्य रुपमा हेलमट लगाउन आग्रह गरिएको थियो ।
नियन्त्रणका लागि दुई दिन अघि देखि ट्राफिक प्रहरी गम्भीर भएर लागेको जिल्ला ट्राफिक प्रहरी कार्यालय सुनसरीका प्रहरी निरिक्षक सुवास केसीले बताए ।
यस क्षेत्रमा अन्य सवारी साधन भन्दा पनि सिटी सफारी र टेम्पोको बढी आवागमन हुने गर्छ । धरान उपमहानगरपालिकाले इ रिक्सा ऐन दर्ता गरेर प्रक्रियामा लगिएको भएपनि धेरै इ रिक्साहरु दर्ता छैनन, जथाभावि सञ्चालन गर्दा दुर्घटनाको जोखिम बढेको छ
भने अस्पतालमा ट्राफिक जाम हुँदा विरामी बोकेर आएका सवारी साधनलाई समस्या हुने गरेको छ । यस्ता समस्यालाई सबै मिलेर नियन्त्रण गर्ने प्रयास थालिएको धरान उपमहानगरपालिकका अनुगमन अधिकृत वेदप्रसाद सापकोटाले बताए ।