_1693980289.gif "#")
धरान /धरानको लागि ई रिक्सा (सिटी सफारी) ट्राफिक व्यवस्थापनकोलागि टाउको दुखाइको विषय बनेको छ ।
दर्ताविना जथाभावि सञ्चालन भएका सिटी सफारीको स्थानीय सरकार धरान उपमहानगरपालिकाले दर्ता प्रक्रियालाई अगाडि बढाए पनि सबै सिटी सफारी दर्ता नै छैनन् ।
यसैलाई मध्यनजर गरी सिटी सफारी व्यवस्थापनका लागि स्थानीय सरकार धरान उपमहानगरपालिका र जिल्ला ट्राफिक प्रहरी कार्यालय सुनसरीले संयुक्त पहल थालेका छन् ।
ई–रिक्सा (सिटी सफारी) ट्राफिक व्यवस्थापनमा धरानको मात्र हैन सबै सहरहरुको टाउको दुखाइको विषय बनेको छ ।
केही समय अगाडि इटहरी उपमहानगरपालिकाले सिटी सफारीलाई व्यवस्थापन गरेसँगै अहिले धरान उपमहानगरपालिकाले समेत जिल्ला ट्राफिक कार्यालयसँग समन्वय गरेर व्यवस्थापनको प्रक्रिया अगाडि सारेको हो ।
धरानको भानुचौकमा सबै सिटी सफारी चालकलाई जम्मा गरी यस सम्बन्धी जानकारी दुवै निकायले गराए । सिटी सफारी प्रक्रियागत रुपमा सञ्चालन गर्न र ट्राफिक नियम पालन गर्न सुझाए ।
व्यवस्थापन गर्न सहयोग गर्न चालकहरुलाई अनुरोध गरे । तर सिटी सफारीहरुले उनीहरुहरुको आग्रहलाई मनन गर्दै सिटी सफारीले भोग्नुपरेको समस्याका विषयमा खुलेर सम्बन्धित निकायलाई बताए ।
उनीहरुले सिटी सफारीको निश्चित स्टेण्ड नभएकोे, राखिएको ठाउँबाट टेम्पो चालकले अवरोध गर्ने भन्दै व्यवस्थापनमा सम्बन्धित पक्ष गम्भीर नहुँदा भानुचौक एरिया जाम हुने गरेको बताएका थिए ।
उनीहरुलेपटक पटक स्थानीय सरकारले आफूहरुको समस्या समाधानका लागि गुहार्दा समेत कुनै सुनुवाई नभएको नेपाल श्रमिक सिटी सफारीकी सचिव रिना लामाले बताइन् ।
स्थानीय सरकार धरान उपमहानगरपालिकाले दर्ता प्रक्रियामा आउन पटक पटक आवहान गर्न सूचना जारी गर्दा पनि नआएकोले व्यवस्थापन गर्न समस्या भएको बताएको छ ।
धरानमा ५ सयदेखि ७ सय सम्म ई–रिक्सा सञ्चालनमा आए पनि अहिले चारवटामात्र उपमहानगरपालिकामा दर्ता भएको धरान उपमहानगरपालिकाका अनुगमन अधिकृत वेदप्रसाद सापकोटाले बताए ।
जिल्ला ट्राफिक प्रहरीले भने बढ्दै गएको समस्या समाधानको खाँचो रहेकोले अहिले सबैलाई भेला गराएर कार्यक्रमको आयोजना गरेको जनाएको छ ।
लाइसेन्स नहुनेले लाइसेन्स लिने र दर्ता नभएकाहरुले दर्ता प्रक्रियामा जाने र ट्राफिक नियमलाई गम्भीर भएर पालना गरेमात्र धेरै समस्या समाधान हुने जिल्ला ट्राफिक प्रहरी कार्यालयका प्रमुख प्रहरी निरीक्षक सुवास केसीले बताए ।
यता सफारी चालकहरुले समेत दुर्घटनामा सवारी चालकको समेत हात भएको स्वीकारेका छन् ।
नियमनकारी निकायले ट्राफिक नियम उल्लंघन गर्नेलाई कारबाही गर्ने र सचेतनामूलक कार्यक्रम सञ्चालन गर्ने अनि सवारी चालकले समेत ट्राफिक नियम आफैको लागि सोचेर पालना गर्ने हो भने धरानमा हुने ट्राफिक जाम, दुर्घटनाको जोखिम कम भएर जाने बताएका थिए ।
