_1693980289.gif "#")
धरान / धरानस्थित महेन्द्र बहुमुखी क्याम्पसको नेपाली विभागले प्रकाशन गरेको अनुसन्धनात्मक जर्नल ‘ज्ञानदीप’ को विमोचन गरिएको छ ।
क्याम्पसकै सभाकक्षमा शुक्रबार आयोजित कार्यक्रममा जर्नल विमोचन गरिएको हो ।
प्राडा गोपालप्रसाद भण्डारी प्रधान सम्पादक र प्राडा रमेश घिमिरे सम्पादक रहेको सो जर्नलमा १३ वटा अनुसन्धानात्मक लेखहरू समेटिएका छन् ।
सो जर्नलमा र्अना सापकोटा, इन्दिरा राई, गुरुप्रसाद पोखरेल, डा टङ्कप्रसाद पन्थ, डा दीपकप्रसाद न्यौपाने, डा प्रेमप्रसाद तिवारी, राजेश विद्रोही, लक्ष्मीकृष्ण श्रेष्ठ र रमेशकुमार श्रेष्ठ, शक्तिराज नेपाल, डा शङ्करप्रसाद गैरे, डा शालिकराम पौड्याल, सीता अधिकारी थापा र डा सुभाषचन्द्र न्यौपानेका लेखहरू सङ्कलित छन् ।
त्यस क्रममा जर्नलका प्रधान सम्पादक भण्डारी र सम्पादक घिमिरेलाई सम्मान पनि गरिएको थियो ।
विभागीय अध्यक्ष डा दीपकप्रसाद न्यौपानेको अध्यक्षतामा सम्पन्न कार्यक्रममा क्याम्पस प्रमुख चन्द्रकुमार राईले क्याम्पसमा सम्पन्न हुने प्राज्ञिक कार्यहरूमा क्याम्पसले सबै किसिमबाट सहयोग गर्ने बताए ।
कार्यक्रममा बोल्दै प्राडा टङ्कप्रसाद न्यौपाने र प्राडा अशोक झाले जर्नल प्रकाशनका लागि विभागलाई धन्यवाद दिएका थिए ।
विभागका सदस्य डा सुभाष न्यौपानेले सञ्चालन गरेको कार्यक्रममा विभागका अर्का सदस्य राजेश विद्रोहीले स्वागत मन्तव्य व्यक्त गरेका थिए ।
