धरान/ सोलुखुम्बुमा बिषालु च्याउ खाँदा ७ जना बिरामी भएका छन् ।
सोलु दुधकुण्ड नगरपालिका–११ बेलिडाँडाका ३ परिवारका ७ जना बिरामी भएको जिल्ला प्रहरी कार्यालय सोलुखुम्बुले जनाएको छ ।
जिल्ला प्रहरी कार्यालय सोलुखुम्बुका सूचना अधिकारी रामकिशोर शाहका अनुसार बुधबार दिउँसो जंगलबाट ल्याएको च्याउ खाँदा ४६ वर्षीय रामबहादुर मगर, ४५ वर्षीया कुमारी मगर, २२ वर्षीया सुनिता मगर बिरामी भएका हुन् ।
यसैगरि ३२ वर्षीय डोलबहादुर खड्का, ५८ वर्षीया डिकुरी माया मगर, ४६ वर्षीय इन्द्रबहादुर मगर र ४० वर्षीय काले मगर बिरामी भएको सूचना अधिकारी साहले जानकारी दिए ।
उनीहरुलार्य जिल्ला अस्पताल फाप्लुमा उपचारका लागि लगिएको थियो । उपचारमा गएकामध्ये ६ जना स्वास्थ्य अवस्था सामान्य भई घर फर्किएका छन भने एकजनाको उपचार भइरहेको प्रहरीले जनाएको छ ।
