_1693980289.gif "#")
सुनसरी /अल्पमतमा परेको कोशी प्रदेश सरकारलाई विश्वासको मत नदिइ आ – आफ्नो नेतृत्वमा सरकार बनाउने गृहकार्यमा नेपाली कांग्रेस र नेकपा माओबादी लागेका छन् ।
दुबै पार्टी मुख्यमन्त्री हिक्मतकुमार कार्कीलाई विश्वासको मत नदिने एकै ठाउँ उभिए पनि सरकारको नेतृत्व लिन आ – आफ्नै अडानमा रहेका छन्। नेपाली काङ्ग्रेसका कोशी प्रदेश संसदीय दलका नेता उद्धव थापाले विश्वासको मत नदिने बताउदै बरु आवश्यकता परेमा मध्यावधि निर्वाचनमा जान सकिने प्रतिक्रिया दिए ।
उनले मुख्यमन्त्रीले विश्वासको मत माग्दै पत्र पठाउनु स्वभाविक भएको बताउदै उनले त्यसको जवाफ संसदबाटै दिने पनि बताए ।थापाले कोशी प्रदेशसभाको विपक्षी गठबन्धनको ठूलो दल भएकाले नयाँ सरकारको नेतृत्व कांग्रेसले गर्न पाउनुपर्ने पनि बताए ।
यता नेकपा माओवादी केन्द्रले कोशी प्रदेशसभा संसदीय दलको बैठकले मुख्यमन्त्रीलाई विश्वासको मत नदिने र आफ्नै नेतृत्वमा सरकार गठनको पहल गर्ने निर्णय गरेको संसदीय दलका नेता इन्द्रबहादुर आङ्बोले जानकारी दिए ।
उनले भने, मुख्यमन्त्रीले विश्वासको मत पाउनुहुन्न, उहाँ पदमुक्त हुनुहुन्छ, त्यसपछि नयाँ मुख्यमन्त्री चयनको प्रक्रिया अगाडि बढ्छ, प्रदेश प्रमुखले सरकार गठन आह्वान गरेपछि केन्द्रीय गठबन्धन र यहाँको गठबन्धन बसेर निर्णय गर्छौं । कोशी प्रदेशका मुख्यमन्त्री कार्कीले विहिवार प्रदेशसभामा विश्वासको मत लिँदैछन् ।
विश्वासको मत लिनुअघि उनले प्रदेशसभामा रहेका सबै दललाई पत्र लेखेर विश्वासको मत दिन अपिल गरेका छन् ।
९३ सदस्यीय कोशी प्रदेशसभामा विश्वासको मत पाउन ४७ मत आवश्यक पर्छ । मुख्यमन्त्रीको दल नेकपा एमालेसँग ४०,राप्रपाको ६ सिट छ ।
