पिण्डेश्वरमा सहमतीय आधारमा स्ववियुको टुंगो : अनेरास्ववियुका एनिस सभापति

धरान ः नेपाल संस्कृत विश्वविद्यालयअन्तर्गतको आङ्गिक विद्यापीठ पिण्डेश्वर विद्यापीठ, धरान १४ मा सहमतीय आधारमा स्ववियु पदाधिकारीको टुंगो लागेको छ । स्ववियू निर्वाचन समितिले आइतबार निकालेको उमेद्वारको अन्तिम नामावलीका आधारमा पदाधिकारीहरुको टुंगो लागेको बुझिएको छ । जसमा अनेरास्ववियुका एनिस रेग्मी सभापति भएका छन् ।

सहमतीका आधारमा अनेरास्ववियुबाट सभापति सहित ५ सदस्य रहेका छन् । सदस्यहरुमा पुरुषोत्तम दाहाल, प्रदीप नेपाल, विपिन गौतम, सुधाकर पोख्रेल र सुवास चापागाईँ रहेका छन् । त्यसै गरी अनेरास्ववियु (क्रान्तिकारी)को भागमा सचिव र एक सदस्य परेको छ । सचिवमा गुणराज निरौला रहेका छन् भने सदस्यमा मनिष भट्टराई रहेका छन् । त्यसै गरी नेविसंघको भागमा कोषाध्यक्ष र २ सदस्य परेको छ । कोषाध्यक्षमा पुष्कर निरौला र सदस्यहरुमा सोमनाथ दाहाल, मनोज सुवेदी रहेका छन् ।

प्रत्यक्ष र समानुपातिक उमेद्वारको अन्तिम नामावली प्रकाशन सँगै सहमतीय आधारमा पदाधिकारी छनौट भएको निर्वाचन समितिले जनाएको छ । प्रत्यक्षमा सभापति, सचिव, कोषाध्यक्ष सहित ४ सदस्य र समानुपातिकमा ४ सदस्यको मनोनयन दर्ता गरिएको पनि निर्वाचन समितिले प्रकाशन गरेको सूचनाका आधारमा बुझिएको छ । यसरी चैत्र ५ गते सम्पन्न गर्ने गरी निकालिएको कार्यतालिका भए पनि २८ गते मनोनयन दर्ताको नतिजा प्रकाशनको प्रक्रियासँगै स्ववियु पदाधिकारीको निर्वाचन प्रक्रिया टुंगिएको निर्वाचन समितिले जनाएको छ । निर्वाचन समितिमा उपप्राध्यापक कृष्णगोपाल अधिकारी निर्वाचन अधिकृत रहेका थिए भने नि.सहायक प्रशासक भेषबहादुर निरौला सदस्य सचिव रहेका थिए ।