मेघा हिमालयनका विद्यार्थीहरू विशेष प्रशिक्षणका लागि पोखरा जाँदै

धरान/धरान मेघा हिमालयन कलेजमा होटल व्यवस्थापन सङ्कायतर्फ कक्षा १२ मा अध्ययनरत् विद्यार्थीहरू विशेष जापानी परिकार बनाउने कला सिक्न नेपालकै प्रमुख पर्यटकीय गन्तव्य पोखरा जाने भएका छन् ।

विद्यार्थीहरूको टोली बुधबार (फागुन ९) त्यसतर्फ प्रस्थान गर्ने मेघाका होटल व्यवस्थापन सङ्काय प्रमुख पोषण श्रेष्ठले जनाए । उनीहरूलाई होटल व्यवस्थापनमा उत्कृष्ट प्रयोगात्मक प्रशिक्षण दिने गरेको कलेजमा लगिने श्रेष्ठले बताए । पाठ्यक्रममा समावेश प्रयोगात्मक कार्यबाहेक वाइन सेंसोरी (वाइन मेकिङ), बारटेन्डिङ कार्यशाला, वाइन कार्यशालाजस्ता विशेष प्रयोगात्मक कक्षा सञ्चालन गरिरहेको कलेजमा लगिनेछ ।

उनीहरूलाई नेपालकै प्रसिद्ध सेफ आरके लामा (राजकुमार लामा) ले प्रशिक्षण दिनेछन् । लामा आरके हस्पिटालिटीका अध्यक्ष पनि हुन् । उनी होटल व्यवस्थापनका लागि स्नातक तहमा पोखराकै उत्कृष्ट कलेज नेपाल टुरिजम एन्ड होटल म्यानेजमेन्टका पूर्वसेफसमेत हुन् । निकट भविष्यमा नेपालकै ठूलो कुलिनरी स्कुल खोल्ने लक्ष्य लिएका लामाले देश तथा विदेशमा दर्जनौँ होटल रेस्टुेन्टहरूमा अनुभव लिइसकेका छन् ।

यसका साथै विद्यार्थीहरूलाई पोखराको पाँचतारे होटलमा सेमिनारमा समेत सहभागी गराइने मेघाका होटल व्यवस्थापन सङ्काय प्रमुख श्रेष्ठले बताए । उनका अनुसार होटल उद्योगमा लामो अनुभव बटुलिसकेका व्यक्तिहरूले सेमिनारमा आफ्ना अनुभव र ज्ञान बाँड्नेछन् ।