_1693980289.gif "#")
धरान\ सुनसरीको धरान उपमहानगरपालिकाका मेयर हर्कराज राईले आफ्नो कार्यकक्षमा राष्ट्रपति रामचन्द्र पौडेल र प्रधानमन्त्री पुष्पकमल दाहालको फोटो. हटाएर किराती राजा यलम्बरको फोटो.झुण्ड्याएका छन् ।
अन्य स्थानीय तहको भन्दा पृथक काम गरेकै कारण अहिले सबैतिर चर्चाको विषय बनेको छ ।
धरानको खानेपानी समस्या समाधान गर्ने एजेण्डा बोकेर निर्वाचित भएका मेयर राई समय समयमा विवादमा तानिइरहेका छन् ।
खानेपानी समस्या समाधानसँगै श्रमसंस्कृतिको विकास गर्ने लक्ष्य लिएका राइले उपमहानगरपालिकाको उनको कार्यकक्षमा राष्ट्रपति र प्रधानमन्त्रीको फोटो हटाएर किराँती राजा यलम्बरको फोटो झुण्ड्याएका छन् ।
गत बुधबार राती उनले सामाजिक सञ्जालमा स्टाटसमा ‘धरान संघीय सरकारको महत्व नदिए प्रधानमन्त्री र राष्ट्रपतिको फोटो हटाउने धम्कीपूर्ण शब्द लेखेका थिए ।
त्यस्तै उनले सामाजिक सञ्जालमै ‘म राष्ट्रपति र प्रधानमन्त्रीको फोटो हटाएर यलम्बरको फोटो राख्दैछु ! जुन दिन केन्द्रले धरानलाई महत्व दिन्छ त्यो दिन पुनः उनीहरुको फोटो टाँस्नेछु ! जय देश !,’
भनेर पनि लेखेका छन् ।
उनले विहीबार राष्ट्रपती र प्रधानमन्त्रीको तश्वीर हटाएर यलम्बरको फोटो हालेका छन् ।
यस विषयमा बुझ्न जाँदा मेयर साम्पाङसँग भेट भएन । कार्यकक्षको फोटो झुण्ड्याइएको क्लिप लिन जाँदा समेत कार्यरत कर्मचारीलाई ‘मेयरसापले पत्रकारलाई खिच्न नदिनु’ भन्ने निर्देशन दिएको भन्दै त्यहाँ पुगेका सञ्चारकर्मीलाई कार्यकक्षको फोटो समेत खिच्न दिइएन् ।
यस विषयमा धरान उपमहानगरपालिकाका उपप्रमुख अइन्द्रविक्रम बेघाले आफूलाई यस बारे केही थाहा नभएको र हँटाइएको भए कानुनी राज्यमा विधिसम्वत नभएको बताए ।
उनले किराँती राजा यलम्बरको फोटो राख्नु कुनै आपत्ति नभएको तर प्रतिसोध राखेर प्रधानमन्त्री र राष्ट्रपतिकै भित्तामा टाँसेको फोटो हटाएर राख्नुचाहिँ गलत भएको बताए ।
उनले देशमा तीन तहका सरकार रहेको र तीन तहकै सरकारले राष्ट्रपति र कार्यकारी प्रधानमन्त्रीको फोटो राख्ने प्रावधान रहेकोले यसलाई उल्लंघन गर्दै त्यसो गरिएको हो भने गलत भएको बताए ।
स्वतन्त्रबाट निर्वाचित भएका राइले धरान उपमहानगरपालिकालाई केन्द्र सरकारले महत्व नदिएको आरोप लाउदै विभिन्न समयमा सामाजिक संजालमा लेख्ने गरेका छन् ।
धरानमा बनाउने भनिएको एयरपोर्ट प्राविधिक कारणले नबन्ने भए पछि उनले केन्द्रिय सरकारसँग रिस पोखेको स्थानीयको बुझाइ छ ।
अहिले यो विषय धरानमा मात्र हैन राष्ट्रिय चर्चाको विषय बनेको छ । मेयर साम्पाङले गरेको काम कानुनी राज्यमा उपयुक्त हो होइन भन्ने विषयमा धरानमा बहस समेत चल्न थालेको छ ।
