विराटनगर/ स्थानीय उत्पादन सयपत्री फुलको बजारीकरणलाई प्रोत्साहन गर्न सरकारले नै भारतीय फुलको व्यापार निस्तेज गर्न खोजिरहेको छ तर देशका सिमानाकाका शहरहरुमा भने भारतीय फुलको व्यापार फस्टाउँदै गएको छ ।
तिहार नजिकिँदै जाँदा नेपाली बजार भारतीय फूलले ढाकेको छ । यस वर्षका लागि नेपालमै उत्पादित सयपत्री फुलले बजार धान्ने भएकाले भारतीय फुल आयातमा रोक लगाए पनि विराटनगरमा भारतीय फुलको व्यापार फस्टाउँदै गएको छ ।
भारतीय सयपत्री फूलको व्यापार ९० प्रतिशत भइरहेको छ । भन्सार छलि गरेर ल्याइएका भारतीय फुलले विराटनगरको बजार ढाकेको छ ।
नेपाली फूलको उत्पादनको प्रबद्र्धन गर्ने उदेश्यले विदेसी फूल आयातमा प्रतिबन्ध लगाइए पनि भारतीय फूलले बजार ओगट्ने गरेको हो ।
विराटनगर भन्सार कार्यालयबाट भने फूल आयात भएको तथ्याक देखिँदैन । भन्सारमा राजश्व तिरेर भारतबाट फूल नभित्रिएको विराटनगर भन्सार कार्यालयका सूचना अधिकारी परशुराम दाहालले बताए । उनको भनाईले पनि पुष्टि गर्छ नेपालमा अवैध ढंगले फुलहरु भित्रिने गरेको छ ।
तिहारलाई लक्षित गर्दै नेपाली बजारमा सयपत्री फूलको व्यापार सुरु भइसकेको छ । विराटनगरको बजारमा रहेका फूलका पसलहरूमा प्रायः जसो भारतको कलकत्ताबाट ल्याएका फूलहरू व्यवसायीहरूले बेचिरहेका छन् । प्लास्टिकका फूलहरूले समेत बजार ढाकेको छ ।
भन्सारबाट नभित्रिए पनि विराटनगरका पुष्प व्यवसायीहरूले भने भारतको कलकत्ताबाट ल्याएर बेच्ने गरेको बताए । कलकत्ताबाट आठ हजार सयपत्री फूलको माला ल्याएको विराटनगरको जय गुरु फूल डेकोरेसन पसलका संचालक अमल बेराले बताए । एउटा मालाको १ सय २० रुपैयाँमा बेच्ने गरेको उनले बताए ।
नेपालमा उत्पादन हुने भन्दा भारतबाट ल्याएको फूल बढी टिकाउ हुने भएकोले व्यापारीहरु त्यसतर्फ आकर्षित भएको बताउने गरेका छन् । ‘भारतबाट ल्याउँदा मूल्य पनि सस्तो पर्छ, अमलले भने ‘फूल पनि छिटै ओइल्याउँदैन । नेपालमा उत्पादन गरेको छिटै बिग्रिहाल्छ ।’
हप्तामा तीन पटक कलकत्ताबाट ल्याएर बेच्ने गरेको व्यापारीहरू बताउँछन् । मंगलबार, बिहीबार र शनिबार आफ्नो पसलमा भारतबाट फूल आउने गरेको विराटनगरकै राधाकृष्ण फ्लावर पसलका संचालक रुपेश साहले बताए ।
माहा दुर्गा फ्लावर एन्ड डेकोरेसन पसलका संचालक अभिजित मनिकले हप्ताको दुईदेखि तीन दिनभित्र तीन हजार थान फूलको माला बिक्री गर्ने गरेको बताए । भन्सारबाटै राजश्व तिरेर विराटनगरको गुद्रीमा फूल आउने गरेको र आफूले त्यहाँबाट लिने गरेको उनले बताए ।
बजारमा प्लास्टिकका फूलहरू पनि छ्याप्छ्याप्ती छ । सरकारले फूलमा नेपाल आत्मनिर्भर भएको भने पनि बजारमा भारतबाट आयात भएका सयपत्री फूल प्रशस्त रूपमा बिक्री भइरहेको व्यापारीहरू नै बताउँछन् ।