इनरुवा/ सुनसरीको भोक्राहा नरसिंह गाउँपालिकाका किसान अहिले आलु रोप्न व्यस्त भएका छन् ।
धान र जुट खेती गरेका किसानले बाली भित्र्याएर अहिले आलु रोप्न व्यस्त भएका हुन् । अहिले भोक्राहा नरसिंहका किसानलाई आलु रोप्ने कामले भ्याइ नभ्याई छ । आलु रोप्नको लागि जग्गा जोत्ने, खन्ने, मल बोक्ने र आलु रोप्ने काममा किसान व्यस्त भएका छन् ।
भोक्राहा नरसिंह गाउँपालिका ५ को नरसिंह टपरा क्षेत्रमा किसान एक हजार बढी हेक्टर क्षेत्रफल जमिनमा आलु खेती गर्दै आएका छन् ।
यहाँका किसानको हिउदे बालीमा मुख्य उत्पादन नै आलु रहेको किसान शिवराम यादवले बताए । आलुको माग बजारमा उच्च भएपछि किसानहरू थप व्यावसायिक रूपमा आलु खेतीमा लागेका स्थानीय किसान मनोज कुमार यादवले बताए ।
नरसिंहका कतिपय किसानले एक सिजनमा पाँच लाख रुपैया सम्मको आलु उत्पादन गरेर बिक्री गर्ने गरेको यादवको भनाई छ ।
गाउँको आलु जिल्ला सदरमुकाम इनरुवा हुँदै अन्य मुख्य तरकारी बजारमा बिक्री हुने गरेकोले बजारको अभाव नभएको अर्का किसान मिथलेश यादवको भनाई छ । विगतमा परम्परागत पुरानो आलुको बिउँ लगाउँदै आएको किसानहरु अहिले नयाँ जातको बिउँ लगाउन सुरु गरिएको छ ।
यसले आलुको उत्पादन बढाउने भएको छ । सुनसरीमा कुल आलु उत्पादनको झण्डै ३० प्रतिशत भोक्राहा नरसिंहमा उत्पादन हुने गरेको कृषि शाखाको दावी रहेको छ ।