_1693980289.gif "#")
धरान /धरानमा डेंगु संक्रमणकाे अवस्था भयावह हुदा उपचारको नाममा मेडिकलहरुले ब्रम्हलुट गर्न थालेपछि वडाहरुले धमाधम मेडिकल हलको अनुगमन थालेका छन् ।
दुई दिन अगाडि धरान १६ ले अनुगमन शुरु गरेको थियो भने व्यापक जनगुनासो आएपछि ३ नं. वडा समिति धरानले समेत अनुगमन थालेको छ ।
अनुगमनका क्रममा बढी मूल्य भएको पाइएपछि मेडिकलहरुलाई चेतावनी समेत दिइएको छ ।
धरानमा दिनप्रतिदिन डेंगुका विरामी बढेका छन् ।
संक्रमण भएको आशंका लागेपछि सर्वसाधारण नजिकैको औषधि पसलमा जान्छन् ।
धरान उपमहानगरपालिकाले डेंगु चेकका लागि ५ सय रुपैया लिन मेडिकलहरुलाई निर्देशन दिएको छ तर पनि औषधि विक्रेताहरुले १ हजारदेखि १ हजार ५ सय सम्म लिने गरेको जनगुनासो बढिरहेको छ ।
अनुगमनका क्रममा सर्वसाधारणले गरेको गुनासो सत्य प्रमाणित पनि भएको छ ।
कारबाही प्रक्रिया फितलो हुदा समस्या समाधान भने भएको छैन ।
सर्वसाधारणको व्यापक गुनासोपछि अनुगमनमा निस्किएको ३ नं. वडा समितिको टोलीले सर्वसाधारणलाई टेष्टको नाममा मेडिकल हल तथा ल्याबहरुले बढी मूल्य लिएको मेडिकलमा सरसफाइ नगरी वेडमा राखेर स्वास्थ्यमाथि खेलबार्ड गरेको पाइएको थियो ।
उनीहरुलाई अनुगमनको क्रममा त्यस्तो नगर्न चेतावनी दिइएको वडाध्यक्ष विद्या शाक्यले बताए ।
स्वास्थ्य क्षेत्रजस्तो संवेदनशिल क्षेत्रमा समेत मौकाको फाइदा उठाएर कमाउधन्दा चलाएकोप्रति टोल विकास समितिले समेत आपत्ति जनाएको छ ।
टोलविकास समितिकी अध्यक्ष पद्मा पाख्रिनले स्वास्थ्यको क्षेत्रमा होस् या दैनिक उपभोग्य वस्तुमा होस वडा कार्यालय, टोल विकास समितिले निगरानीसँगै अनुगमनलाई तिब्रता दिनुपर्नेमा जोड दिइन् ।
मेडिकल व्यवसायीहरुले भने अनुगनका क्रममा आफू चोख्खिएर अरुलाई दोष देखाएका थिए ।
आफूहरुसँग ल्याव टेष्ट नभएकोले टेष्टका लागि ल्याब नै सेम्पल पुर्याउनुपर्ने भएकोले ल्यावले दिएको मूल्य सूचिको आधारमा रकम लिएको बताएका थिए ।
हेल्पिङ हेण्ड मेडिकल हल धरान ३ का सञ्चालक प्रवीन सेन्चुरीले आफूहरुले धरान २ मा रहको नेशनल डाइग्नोस्टिकमा पठाउने गरेको र ल्यावले पठाएको रेड लिष्ट भन्दा बढी नलिएको बताए ।
डेंगुको संक्रमणले धरानलाई आक्रान्त बनाएको समयमा अहिले स्थानीय सरकारको हैसियतले वडावडाबाट लार्भा नष्ट गर्ने अभियान अन्तर्गत सर्च एण्ड डिस्ट्रोय, मेडिकल पसलहरुमा अनुगमनलाई तिब्रता दिएको छ ।
यसमा वडा कार्यालयहरुले सक्रियता बढाएको वडा सदस्य शोभा अधिकारीले बताइन् ।
अहिले धरान उपमहानगरपालिकाले किट खरिद गरेर सर्वसाधारणको डेंगुको निःशुल्क टेष्ट गर्दै आएको छ ।
धरान उपमहाननगरपालिका अन्तर्गत स्वास्थ्य महाशाखाले दिएको तथ्यांक अनुसार धरानमा ४ हजार ४ सय १३ जनाको डेंगु टेष्ट गर्दा २ हजार ६ सय ५४ जनामा संक्रमण भएको पाएको छ ।
डेंगुकै कारण ४ जना महिला र ४ जना पुरुष गरी ८ जनाले ज्यान गुमाउनु परेको अवस्था छ ।
यस्तो संक्रमणको अवस्थामा पनि मानवीय संवेदना नहेरी टेष्टको नाममा व्रम्हलुट गर्ने मेडिकल हल, ल्याब लगायतलाई कारबाही भने भएको पाइदैन
