धरान / यहाँस्थित दोभान पार्कमा मङ्गलबार झन्डै एक दर्जन कवि र केही स्रोताहरू भेला भएका थिए । उद्देश्य थियो, प्रेम–कविता सुन्ने र सुनाउने । यो चाँजोपाँजो मिलाइदिएको थियो– धरान–३ वडा कार्यालयले ।
प्रेम दिवसको अवसर पारेर धरान–३ ले केही वर्षयता हरेक वर्ष दोभान पार्कमा यस्तो कार्यक्रम आयोजना गर्ने गरेको छ । यसै क्रममा मङ्गलबार पनि प्रेम दिवसकै दिन पारेर यसले कार्यक्रम आयोजना गरेको छ ।
कार्यक्रममा चन्द्र गुरुङ, प्रदीप योङ्हाङ, इन्दु योन्जन, सन्तोष थेवे, सुदीप पाख्रिन, मिलन राई, हेनसेन याक्खा, विशाल नाल्बो, डा विशालबाबु भट्टराई, चेवन राईलगायतले कविता वाचन गरेका थिए ।
कलरव धरानले संयोजन गरेको कार्यक्रममा वडा सदस्य मनिष खड्गीले आफ्नो पूर्वप्रेमको प्रसङ्ग सुनाउँदा वातावरण साँच्चै नै प्रेमिल बन्न पुगेको थियो । स्रोताहरूले पनि कविता र प्रेम प्रसङ्गसम्बन्धी निजी अनुभूतिबाट आनन्द लिएका थिए । कवि सुदीप पाख्रिनले सञ्चालन गरेको कार्यक्रममा वडाध्यक्ष विद्या शाक्य तथा वडा सदस्यहरू उषा सुब्बा र मिङ्मा भोटे पनि उपस्थित थिए । सो अवसरमा सुब्बा र भोटेले आप्mना धारणा सुनाएका थिए ।