मोरङ / नेकपा एमाले सम्बद्ध पत्रकारहरुको संगठन प्रेस चौतारीको २५ औं स्थापना दिवसको अवसर पारेर विराटनगरमा दुई जना पत्रकारलाई सम्मान गरिएको छ ।
आइतबार स्थापना दिवसको अवसरमा प्रेस चौतारी मोरङ जिल्ला कार्यसमितिले शुभकामना आदानप्रदानसँगै जनार्दन मैनाली स्मृति पत्रकारिता पुरस्कार र कृष्णप्रसाद सिग्देल यूवा पत्रकारिता पुरस्कारबाट दुईजना पत्रकारलाई सम्मान गरेको हो ।
जनार्दन मैनाली स्मृति पत्रकारिता पुरस्कार २०७९ बाट तेजेन्द्र भण्डारी र कृष्णप्रसाद सिग्देल युवा पत्रकारिता पुरस्कार २०७९ बाट दिनेश सुब्बालाई सम्मान गरिएको हो ।
पत्रकारद्वय भण्डारी र सुब्बालाई प्रदेश १ का मुख्यमन्त्री हिक्मतकुमार कार्कीले सम्मानपत्र प्रदान गरेका हुन् । सुब्बा नेपाल आदिवासी जनजाति पत्रकार महासंघ (फोनिज) मोरङका जिल्ला अध्यक्षसमेत हुन् ।
