सुत्केरी तथा गर्भवती महिलालाई नगर प्रमुखद्वारा राहत वितरण

वराहक्षेत्र नगरपालिकाका नगर प्रमुख निलम खनालले नगरका सुत्केरी तथा गर्भवती महिलाहरुलाई राहत वितरण गरेका छन् ।

वराहक्षेत्र– १० स्थित प्रकाशपुरका सुत्केरी तथा गर्भवती महिलाहरुलाई ओरेक नेपाल सुनसरीले नगरको एकद्वार प्रणालीमार्फत प्रदान गरेको राहत खाद्यान्न नगर प्रमुख खनालले सम्बन्धित व्यक्तिलाई प्रदान गरेको वडाध्यक्ष महेन्द्रबहादुर खत्रीले जानकारी दिए ।

वराहक्षेत्र नगरपालिका र ओरेक नेपाल सुनसरीको समन्वयमा नगरका सबै वडाका सुत्केरी तथा गर्भवती महिलाहरुलाई राहत उपलब्ध गराइने ओरेक प्रतिनिधि विमला घिमिरेले जानकारी दिइन् ।

 

वराहक्षेत्र नगरपालिकाको ११ वटा वडामा ३ महिनासम्मका १२५ जना सुत्केरी र २४२ जना गर्भवती रहेको तथ्याङ्क छ ।

ती मध्येका गरिव तथा विपन्न वर्गका गर्भवती तथा सुत्केरीको अवस्था हेरेर राहत वितरण गरिने नगर प्रमुख खनालले जानकारी दिए । ५० जना सुत्केरी तथा गर्भवतीका लागि ओरेकले सहयोग गरेको छ भने अन्यलाई नगरपालिकाले सहयोग गर्नेछ ।