धरान/ धरानमा आजदेखि पहिलो पटक रात्रिकालीन रूपमा आयोजना हुन लागेको ‘प्रथम धरान अन्तर्राष्ट्रिय आमन्त्रण महिला गोल्डकप–२०८३’ सुरु हुँदैछ।
डी–१९ क्लब धरान–१९ र स्वर्णिम फुटबल क्लबको संयुक्त आयोजनामा हुने प्रतियोगिताको उद्घाटन खेल आज साँझ ६ बजे हुनेछ।
उद्घाटन खेलमा नेपालको चर्चित विभागीय टोली नेपाल एपीएफ क्लब र भारतको झारखण्डस्थित अक्वा क्लबबीच प्रतिस्पर्धा हुने आयोजकले जनाएको छ।
धरान–१६ स्थित धरान रंगशालामा सञ्चालन हुने प्रतियोगिता मंसिर ६ गतेसम्म चल्नेछ।
प्रतियोगितामा नेपालका राष्ट्रिय महिला खेलाडीले भरिएको एपीएफसँगै नेपाल पुलिस क्लब, त्रिभुवन आर्मी क्लब, बागमती फुटबल क्लब, उदयपुर फुटबल क्लब, काँकडभिट्टा फुटबल क्लब, भारतको झारखण्डस्थित अक्वा क्लब र आयोजक स्वर्णिम फुटबल क्लब गरी आठ टोली सहभागी छन्।
प्रतियोगिताको विजेताले च्याम्पियन ट्रफीसहित नगद ५ लाख रुपैयाँ प्राप्त गर्नेछ भने उपविजेताले ३ लाख रुपैयाँ पुरस्कार पाउनेछ।
त्यस्तै, प्रतियोगिताकै सर्वोत्कृष्ट खेलाडीलाई इभी स्कुटर प्रदान गरिनेछ भने प्रत्येक खेलको उत्कृष्ट खेलाडी (प्लेयर अफ द म्याच) ले १० हजार रुपैयाँ पाउनेछ।
यसैगरी उत्कृष्ट गोलरक्षक, डिफेन्डर, मिडफिल्डर, फरवार्ड, प्रशिक्षक र सर्वाधिक गोलकर्तालाई जनही १५ हजार रुपैयाँ पुरस्कार प्रदान गरिने आयोजकले जनाएको छ।
