धरान/ सुनसरीको धरान–१० स्थित उद्यमशील बचत तथा ऋण सहकारी संस्था लिमिटेडले आर्थिक वर्ष २०८१/०८२ मा १ करोड ४८ लाख ७३ हजार २२५ रुपैयाँ खुद नाफा गर्न सफल भएको छ ।
शनिबार सम्पन्न १४औँ वार्षिक साधारणसभामा प्रस्तुत प्रतिवेदनअनुसार सहकारीले उक्त आर्थिक वर्षमा ४ अर्ब ४२ करोड ७८ लाख ८४ हजार ७२४ रुपैयाँको कुल कारोबार गरेको हो ।
सहकारीको शेयर पुँजी २८ प्रतिशतले वृद्धि भई ७ करोड ४९ लाख ७४ हजार ४ सय रुपैयाँ पुगेको छ भने शेयर सदस्य संख्या ८ हजार ७२८ पुगेको छ ।
प्रतिवेदनअनुसार सहकारीले ७ करोड ८७ लाख ४९ हजार १५० रुपैयाँ आम्दानी गर्दा ६ करोड ३८ लाख ७५ हजार ९२४ रुपैयाँ खर्च गरेको छ । आयकर, ब्याज कर, घरबहाल कर तथा सामाजिक सुरक्षा करलगायत विभिन्न शीर्षकमा सहकारीले ४२ लाख ४३ हजार ७०० रुपैयाँभन्दा बढी राजस्व सरकारलाई बुझाएको जनाएको छ ।
साधारणसभामा प्रमुख कार्यकारी अधिकृत जीतबहादुर राउतले संस्थाको बचतमा ४० प्रतिशत, ऋण लगानीमा १२८ प्रतिशत र ऋण असुलीमा ११० प्रतिशत वृद्धि भएको जानकारी दिए ।
धरान–१० सैनिक चोकमा मुख्य कार्यालय रहेको सहकारीले धरान–५ देउराली, इटहरी र बराहक्षेत्रको चक्रघट्टीमा सेवा केन्द्र सञ्चालन गर्दै आएको छ ।
कार्यक्रममा लेखा तथा सुपरीवेक्षण समितिको वार्षिक प्रतिवेदन पस्किँदै संस्थाका लेखा संयोजक देवचन्द्र शिवाकोटीले कर्जा जोखिम कोषलाई नियमितरुपमा वृद्धि गर्दै लगिएको जानकारी दिए ।
उनले एकजना सदस्यलाई बढीमा एक करोड कर्जा लगानी गरिएको समेत जनाए । उनले संस्थाको सबल पक्ष देखाउँदै यस वर्ष पुँज तथा दायित्व ३६.३८ प्रतिशतले वृद्धि गरेको जानकारी दिए । संस्थाले राखेको वित्तीय लक्ष्य तथा कार्यक्रममा उल्लेख्य प्रगति गरेको देखाउँदै उनले गत वर्ष ५९ करोड ६५ लाख ८९३ नाफा गरेकोमा १ करोड ४८ लाख ७३ हजार २२५ रुपैयाँ नाफा गरेको देखाए ।
कार्यक्रमका प्रमुख अतिथि धरान उपमहानगरपालिकाका कार्यवाहक मेयर अइन्द्रविक्रम बेघाले धरानमा धेरै सहकारी आफ्नै कारण, नियमभन्दा बाहिर कारोबार गर्दा डुब्दै गएको बताए । उनले उद्यमशीलले देखाएको कारोबारले सहकारी मितव्ययी र नियम संगत ढंगले अघि बढेको बताए ।
उनले धरान उपमहानगरपालिकाले सहकारी नियमावली बनाएर सहकारीलाई व्यवस्थित बनाउन लागिएको जानकारी दिए । ‘यो कार्यपालिका बैठकमै यो नियमावली तयार हुने विषय अघि बढ्नेछ ।’ उनले भने ।
कार्यक्रममा बोल्दै सहकारी धरान नगर समन्वय समितिका अध्यक्ष नविन सुब्बाले उद्यमशील बचत अटल रहँदै धरानका सहकारीमध्ये नमूना सहकारी भनेर चिनाउँदै गएको बताए । कार्यक्रममा धरान–११ का वडाध्यक्ष लोकेन्द्र फागो, धरान–१० का वडाध्यक्ष विवेक राई, धरान–५ का वडाध्यक्ष मनप्रसाद लिम्बूलगायतले पनि बोलेका थिए ।
साधारणसभामा असल तथा नियमित बचतकर्ता, ऋणी, सदस्य तथा उत्कृष्ट कर्मचारीलाई सम्मान गरिएको थियो । सोही अवसरमा पत्रकार शेखरनाथ याेगीलाई नगद १० हजार रुपैयाँसहित सम्मान गरिएको थियो ।
