सुनसरी/ सुनसरीको देवानगञ्ज गाउँपालिका–१ मध्येहर्षाहीस्थित बीपी चोकमा दुई यादव समूहबीच भएको झडपमा एक जना घाइते भएका छन्। घटनामा संलग्न रहेको आरोपमा प्रहरीले दुई जनालाई नियन्त्रणमा लिएर अनुसन्धान अघि बढाएको छ।
प्रहरीका अनुसार शनिबार साँझ भएको झडपमा देवानगञ्ज–१ का २४ वर्षीय निरज कुमार यादव घाइते भएका हुन्। उनको विराटनगरस्थित नोबेल अस्पतालमा उपचार भइरहेको छ। उनको स्वास्थ्य अवस्था मध्यम रहेको प्रहरीले जनाएको छ।
घटनामा संलग्न रहेको आरोपमा देवानगञ्ज–२ का १८ वर्षीय विष्णु कुमार यादव र २६ वर्षीय लाली भन्ने जयकृष्ण यादवलाई प्रहरीले नियन्त्रणमा लिएको सुनसरी प्रहरीका सूचना अधिकारी चन्द्र बहादुर खड्काले जानकारी दिए ।
घटनामा संलग्न अन्य व्यक्तिको खोजी भइरहेको प्रहरीले जनाएको छ।
प्रहरीमा प्राप्त प्रारम्भिक विवरणअनुसार देवानगञ्ज–१ यादव टोलका २३ वर्षीय निरज कुमार यादव र उनका छिमेकी तथा भतिजा पर्ने विवेक कुमार यादव हरिनगर बजारबाट मोटरसाइकलमा घर फर्कने क्रममा लक्ष्मी मन्दिरनजिक करिब १५ जनाको समूहले मोटरसाइकल रोकेर कुटपिट गरेको बताइएको छ।
सोही क्रममा पछाडिबाट गोली प्रहार भएको र निरजको दायाँ हिपको भागमा गोली लागेको जस्तो प्वाल देखिएको विवरणमा उल्लेख छ। चिकित्सकले गोली लागेको हुन सक्ने बताए पनि घाइते बोल्न सक्ने अवस्थामा रहेको जनाइएको छ।
घटनाबारे थप अनुसन्धान भइरहेको र संलग्न अन्य व्यक्तिको खोजी जारी रहेको प्रहरीले जनाएको छ।
