सुनसरी/ सुनसरीको बराहक्षेत्रमा प्रहरीले लागूऔषध ब्राउन सुगर सहित एक भारतीय युवकलाई पक्राउ गरेको छ।
बराहक्षेत्र नगरपालिका–९ स्थित बरपिपल चोकमा लौकहीबाट प्रकाशपुरतर्फ आउँदै गरेको बीआर ३८ एपी ०२७७ नम्बरको भारतीय मोटरसाइकललाई प्रहरीले शंका लागेर चेकजाँच गरेको थियो।
चेकजाँचका क्रममा मोटरसाइकल चालक भारतको अररिया बेलवा ग्राम पञ्चायत बस्ने २० वर्षीय बिपिन कुमार यादवको साथबाट ब्राउन सुगर ०.८३ ग्राम (८३० मिलिग्राम) पदार्थ फेला परेको प्रहरीले जनाएको छ।
प्रहरीले यादवलाई उक्त पदार्थ र मोटरसाइकलसहित नियन्त्रणमा लिएर इलाका प्रहरी कार्यालय महेन्द्रनगरमा ल्याएको छ। घटनाबारे थप अनुसन्धान भइरहेको प्रहरीले जनाएको छ।
