प्रधानमन्त्री ओली शनिबार झापा–इलामका विकास योजना उद्घाटन गर्न आउँदै

धरान/ प्रधानमन्त्री तथा नेकपा (एमाले) अध्यक्ष केपी शर्मा ओली शनिबार झापा र इलामका विभिन्न कार्यक्रमहरूमा सहभागी हुन आउँदै छन्।

दुई दिने पूर्वी दौडानमा उनले अस्पताल उद्घाटनदेखि खानेपानी आयोजना र सडक शिलान्याससम्मका कार्यहरूमा सहभागिता जनाउने कार्यक्रम छ।

एमाले झापा अध्यक्ष प्रेम गिरीका अनुसार प्रधानमन्त्री ओली आइतबार र सोमबार (असार २९ र ३०) इलाम र झापाका विभिन्न स्थानमा पुग्ने छन्। आइतबार बिहान बुद्धशान्ति गाउँपालिका–३ स्थित भागीरथा न्यौपाने अस्पतालको उद्घाटनपछि उनी इलामको माई नगरपालिकातर्फ जानेछन्।

माई नगरपालिकामा ओलीले नगर अस्पताल उद्घाटन गर्नुका साथै जग्गा धनीपूर्जा वितरण तथा खानेपानी आयोजना शिलान्यास गर्ने कार्यक्रम तय गरिएको नगर प्रमुख खम्बासिं लिम्बूले जानकारी दिए। त्यही दिन साँझ ओली कन्काई नगरपालिकामा हुने जग्गा धनीपूर्जा वितरण कार्यक्रममा समेत सहभागी हुनेछन्।

सोमबार भने उनले दमक नगरपालिकास्थित कृष्ण मन्दिरबाट उत्तरपूर्वी क्षेत्रतर्फ विस्तार हुँदै गरेको मदनडाँगी–ताराबारी–डिपो सडकखण्ड उद्घाटन गर्ने छन्। त्यसपछि बिर्तामोडको सिटी सेन्टरमा आयोजना हुने एमाले कार्यकर्ता भेलालाई सम्बोधन गरी उनी काठमाडौं फर्किने कार्यक्रम छ।