खोटाङ/ खोटाङको हलेसी तुवाचुङ नगरपालिका–३, आहालेमा धारिलो हतियार प्रहारबाट श्रीमतीसहित चारजना घाइते भएका छन्।
घटनामा संलग्न रहेको आरोपमा ४३ वर्षीय नइन्द्र कुमार राई पक्राउ परेका छन्।
प्राप्त विवरणअनुसार नइन्द्र कुमार राई आफ्नै ससुरालीमा गएर धारिलो हतियार प्रहार गर्दा चारजना घाइते भएका हुन्।
घाइतेमध्ये उनकी श्रीमती ४० वर्षीया अन्जना राईको टाउकोको पछाडिको भागमा चोट लागेको छ। उनको अवस्था गम्भीर रहेको बताइएको छ।
त्यस्तै, ६२ वर्षीया स्यामाउन राईको टाउको तथा दाहिने हातमा चोट लागेको छ। उनको अवस्था पनि गम्भीर रहेको छ।
२५ वर्षीया तेनिना राईको टाउकोमा चोट लागेकाले उनको अवस्था गम्भीर रहेको छ भने नरेन्द्र राईको दाहिने हातमा चोट लागेको र अवस्था मध्यम रहेको जनाइएको छ।
घाइते चारैजनालाई उपचारका लागि नगर अस्पताल दुर्छिममा ल्याइएको छ। उनीहरूको उपचार भइरहेको छ।
धारिलो हतियार प्रहार गर्ने नइन्द्र कुमार राईलाई प्रहरीले पक्राउ गरेको छ। घटनाबारे थप अनुसन्धान भइरहेको प्रहरीले जनाएको छ।
