सुनसरी/धरान उप-महानगरपालिका वडा नं. १३ आपगाछीस्थित अस्थायी प्रहरी चौकी अमरहाटबाट खटिएको प्रहरी टोलीले ठूलो परिणाममा लागू औषध गाँजा बरामद गरेको छ।
प्रहरीका अनुसार मंगलबार राति करिब ११ बजे भेडेटारबाट धरानतर्फ आउँदै गरेको को २ ह ४७३९ नम्बरको अटोलाई शंका लागि जाँच गर्दा झण्डै १९ केजी गाँजा बरामद भएको हो।
अटोमा दुईवटा कालो झोलामा सेतो प्लास्टिकले प्याक गरिएको अवस्थामा १८ वटा पोका फेला परेका थिए।
उक्त अटोका चालक धरान उप-महानगरपालिका–४ निवासी ४८ वर्षीय जोक बहादुर राई, उनका छोरा ३० वर्षीय सुमन राई र अटोमा सवार धनकुटा जिल्ला साँगुरीगढी गाउँपालिका–३ निवासी ३६ वर्षीय सुरज लिम्बुलाई प्रहरीले नियन्त्रणमा लिएको छ।
पक्राउ परेकाहरुलाई इलाका प्रहरी कार्यालय धरानमा राखी थप अनुसन्धान भइरहेको प्रहरीले जनाएको छ।
