‘समृद्ध नेपाल सुखी नेपाली’ अभियानमा लाग्न ओलीको निर्देशन

दमक/ नेकपा एमालेका अध्यक्ष एवम् पूर्व प्रधानमन्त्री केपी शर्मा ओलीले ‘समृद्ध नेपाल सुखी नेपाली’ बनाउने अभियानमा लाग्नका लागि पार्टीका नेता तथा कार्यकर्ताहरूलाई निर्देशन दिएका छन् ।

झापा र इलामका विभिन्न कार्यक्रममा सहभागी हुनका लागि मंगलबार झापा आएका ओलीले झापामा पार्टीका नव निर्वाचित पदाधिकारी तथा सदस्यहरूलाई जनहितमा अधिकतम रूपमा लाग्न अनुरोध गर्दै यस्तो निर्देशन दिएका हुन् ।

‘जनताका आंकाक्षा र अपेक्षा अनुसार काम गर्नुपर्छ’, उनले भने । उनले एकताबद्ध भएर पार्टी काम लाग्न निर्देशन दिदै नेतृत्व छान्ने क्रममा केही असन्तुष्टिहरू भएको भए त्यो बिर्सन पनि आग्रह गरे । ‘जनताको सेवा गर्ने कार्यमा एकताबद्ध भएर जानुपर्छ’, उनले भने ।

ओली तीन दिनसम्म इलाम र झापा रहने कार्यक्रम रहेको नेकपा एमालेका केन्द्रीय सदस्य दीपक कार्कीले बताए ।

इलाममा हुने चुनावी सभालाई सम्बोधन गर्न ओली मंगलवार नै इलाम जाने र बुधबार गृह नगर दमक आउने कार्यक्रम रहेको कार्कीले जानकारी दिए ।

इलामको क्षेत्र नं २ मा उपनिर्वाचन हुँदैछ । क्षेत्र–२ का एमाले उम्मेदवार सुहाङ नेम्वाङ सहित मंगलवारेमा बुधबार चुनावी सभा छ ।

यसैगरी बिहीबार आफ्नो निर्वाचन क्षेत्र गौरादह नगरपालिका ५ स्थित स्कूलचौरमा कार्यक्रम छ ।