_1693980289.gif "#")
धरान । भर्खरै सम्पन्न दोस्रो स्थानीय तहको निर्वाचनमा लौरौ चुनाव चिन्हले चमत्कार गरेको प्रदेश एकका सामाजिक मन्त्री राजन राईले बताएका छन् ।
प्रदेश खेलकुद विकास बोर्डले धनकुटाको भेडेटारमा आयोजना गरेको खेल प्रशिक्षा तथा क्षमता अभिवृद्धि कार्यक्रमलाई सम्बोधन गर्दै मन्त्री राईले विशेष गरी काठमाण्डौ र धरानको लौरोको चर्चा अहिले देशभरि भएको बताए ।
उनले भने–‘ ठुला भनिएका राजनीतिक दललाई यसपालिको स्थानीय तहको निर्वाचनमा लौरोले नराम्ररी कुटेको छ्, यसको चर्चा मुलुकैभरि रहेको छ ।
राईले धरान तथा काठमाण्डौमा स्वतन्त्र उम्मेद्वारले राम्रो मत ल्याएर विजय हासिल गरेको प्रसंगमा बोल्दै ठुला भनेर चिनिएका दलहरुलाई स्वतन्त्र उम्मेद्वारको चुनाव चिन्ह लौरोले चुटेको बताए ।
प्रदेश खेलकुद विकास बोर्डले खेल प्रशिक्षकहरुलाई दीर्घ सेवा पदकले सम्मान गरेकोमा बद्याई दिँदै खेल र खेलाडीहरुका लागि आजको पल उर्जा र उत्साहको पल रहेको बताए ।
प्रदेस खेलकुद विकास बोर्डले जुझारु व्यक्तिहरु पाएको र खेलकुद बुझेको सदस्य सचिव पाएको हुँदा प्रदेशमा अव खेलकुद गतिविधिहरु चलायमान हुने विश्वास समेत व्यक्त गरे । उनले भने–‘ इमानदार भएर लाग्न सक्नु भयो भने खेलक्षेत्रको विकास सम्भावना चुलिएर गएको छ ।’
योजनागत रुपमा अघि बढ्न र सबै कुरामा सरकारको मुख नताक्न मन्त्रीले आग्रह समेत गरे । कार्यक्रममा समाजवादी खेलकुद महासंघको केन्द्रीय उपाध्यक्ष अर्जुन राई , सामाजिक विकास मन्त्रालयका सचिव दिर्घराज मैनालीलेले मन्तव्य व्यक्त गरेका थिए ।
प्रदेश खेलकुद विकास बोर्डकी उपाध्यक्ष जिनाजंग कार्कीको अध्यक्षतामा सम्पन्न कार्यक्रमलाई बोर्डका सदस्य शैलेस विष्टले स्वागत मन्तव्य व्यक्त गरेका थिए । कार्यक्रम युवराज काफ्लेले संचालन गरेका थिए । कार्यक्रममा बोर्डका सदस्य रितेश श्रेष्ठ,खेलकुद विकास समिति धनकुटाका अध्यक्ष मनोज राई लगायतको समेत उपस्थिती रहेको थियो ।
