_1693980289.gif "#")
धरान । स्थानीय तहको निर्वाचनमा १० प्रतिशत मत ल्याउन नसक्दा धनकुटाका १ सय २१ जना उम्मेदवारको जमानत (धरौटी) जफत भएको छ ।
धनकुटा जिल्लामा रहेका ७ सय ८५ जना उम्मेदवार मध्ये १ सय २१ जनाको जमानत जफत भएको हो । नगरपालिका प्रमुखमा ८, उपप्रमुखमा ४ जना, गाउँपालिका अध्यक्षमा ११ जना, उपाध्यक्षमा ६, वडा अध्यक्षमा ५१ जना, महिला सदस्य १२ जना, दलित महिला सदस्य ५ जना र २४ जना खुला सदस्यको जमानत जफत भएको निर्वाचन कार्यालय धनकुटाले जनाएको छ ।
जमानत जफत हुने नगरपालिका प्रमुखमा राप्रपाका ३ जना, स्वतन्त्रका ३ जना र मंगोल नेशनल अर्गनाइजेशन र संघीय लोकतान्त्रिक राष्ट्रिय मञ्चका १÷१ जना रहेका छन् । नगरपालिका उपप्रमुखमा राप्रपाका २ जना र स्वतन्त्र २ जनाको जमानत जफत भएको छ ।
गाउँपालिका अध्यक्षमा स्वतन्त्रका ३ जना, राप्रपा र मंगोल नेशनल अर्गनाइजेशनका २÷२ जना र संघीय लोकतान्त्रिक राष्ट्रिय मञ्चका एक जना तथा गाउँपालिका उपाध्यक्षमा राप्रपाका २ जना तथा मंगोल नेशनल अर्गनाइजेशन, संघीय लोकतान्त्रिक राष्ट्रिय मञ्च र स्वतन्त्रका १÷१ जनाको जमानत जफत भएको छ ।
यस्तै जमानत जफत हुने वडा अध्यक्षहरूमा राप्रपाका २० जना, स्वतन्त्रका ११ जना, मंगोल नेशनल अर्गनाइजेशनका ६ जना, नेकपा एकीकृत समाजवादीका ५ जना, जनता समाजवादी पार्टीका ५ जना तथा नेपाली कांग्रेस, माओवादी केन्द्र, संघीय लोकतान्त्रिक राष्ट्रिय मञ्च र राप्रपा नेपालका एक÷एक जना रहेका छन् ।
जमानत जफत हुनेमा धनकुटा नगरपालिकामा २२ जना, पाख्रिवास नगरपालिकामा २७ जना, महालक्ष्मी नगरपालिकामा १४ जना रहेका छन् । यस्तै छथर जोरपाटी गाउँपालिकामा १४ जना, सहिदभूमि गाउँपालिकामा २१ जना, साँगुरीगढी गाउँपालिकामा १७ जना र चौबिसे गाउँपालिकामा ६ जनाको जमानत जफत भएको निर्वाचन कार्यालय धनकुटाले जनाएको छ
कार्यालयका अनुसार जमानत जफत हुनेमा धनकुटा नगरपालिका प्रमुखका उम्मेदवारमा राप्रपाकी सुमिना तामाङ, स्वतन्त्रका सुन्दरबाबु श्रेष्ठ, उपप्रमुखमा सीताराम श्रेष्ठ, वडाअध्यक्षमा १० जना, महिला सदस्यमा २ जना, दलित महिला सदस्यमा १ जना र खुल्ला सदस्यमा ६ जना उम्मेदवार रहेका छन् ।
यस्तै पाख्रिबास नगरपालिकाका प्रमुखका उम्मेदवारमा राप्रपाका ज्ञानबहादुर पौडेल, मंगोल नेशनल अर्गनाइजेशनका डेभिड राई र स्वतन्त्रका चकेन्द्र बहादुर बस्नेतको पनि जमानत जफत भएको छ । यस्तै उपप्रमुखमा राप्रपाकी रुद्रकुमारी आले र स्वतन्त्र देवकुमारी बस्नेतको पनि जमानत जफत भएको छ । पाख्रिबास नगरपालिकामा १२ जना वडाअध्यक्ष, २ जना महिला सदस्य, ३ जना दलित महिला सदस्य र ५ जना खुल्ला सदस्य उम्मेदवारको जमानत जफत भएको जिल्ला निर्वाचन कार्यालयका सूचना अधिकारी सुरज श्रेष्ठले जानकारी दिए ।
यस्तै महालक्ष्मी नगरपालिका प्रमुखमा राप्रपाका चेतनाथ चापागाईं, संघीय लोकतान्त्रिक राष्ट्रिय मञ्चका गुरुप्रसाद लिम्बू, स्वतन्त्रका विष्णु पौडेलको जमानत जफत भएको छ भने उपप्रमुखमा राप्रपाका इन्दिरा भण्डारीको जमानत जफत भएको छ । महालक्ष्मी नगरपालिकामा ४ जना वडा अध्यक्ष, १ जना महिला सदस्य, १ जना दलित महिला सदस्य र ४ जना खुल्ला सदस्यका उम्मेदवारको जमानत जफत भएको श्रेष्ठले जानकारी दिए ।
साँगुरीगढी गाउँपालिका अध्यक्षमा राप्रपाका नरेन्द्र कुमार राई, मंगोल नेशनल अर्गनाइजेशनका दिनेश कुमार राई, स्वतन्त्रमा भुवन बहादुर लिम्बूको जमानत जफत भएको छ भने उपाध्यक्षमा राप्रपाकी सानुमाया घर्ती (तामाङ) र मंगोल नेशनल अर्गनाइजेशनकी निरण कुमारी राईको पनि जमानत जफत भएको छ । साँगुरीगढी गाउँपालिकामा वडाअध्यक्षमा ७ जना, महिला सदस्यमा २ जना र खुल्ला सदस्यमा ३ जना उम्मेदवारको जमानत जफत भएको जिल्ला निर्वाचन कार्यालयले जनाएको छ ।
सहिदभूमि गाउँपालिका अध्यक्षमा राप्रपाका गुर्दबहादुर राई, स्वतन्त्रका अनिष पुमा राई र माइकल राईको पनि जमानत जफत भएको छ भने उपाध्यक्षमा राप्रपाकी चन्द्रकुमारी राई र स्वतन्त्रकी रमन कुमारी राईको जमानत जफत भएको छ । सहिदभूमि गाउँपालिकामा १० जना वडाअध्यक्ष, २ जना महिला सदस्य र ४ जना खुल्ला सदस्यका उम्मेदवारको जमानत जफत भएको छ ।
चौबिसे गाउँपालिका अध्यक्षमा मंगोल नेशनल अर्गनाइजेशनकी दिलमाया लिम्बू, संघीय लोकतान्त्रिक राष्ट्रिय मञ्चका तत बहादुर लिम्बूको जमानत जफत भएको छ भने उपाध्यक्षमा संघीय लोकतान्त्रिक राष्ट्रिय मञ्चकी शान्तिदेवी लिम्बू पनि जमानत जफत भएको छ । चौबिसे गाउँपालिकामा वडाअध्यक्ष, महिला सदस्य र खुल्ला सदस्यमा एक÷एक जना उम्मेदवारको जमानत जफत भएको छ ।
छथर जोरपाटी गाउँपालिका अध्यक्षमा राप्रपाका निरबहादुर थापा, मंगोल नेशनल अर्गनाइजेशनका कृष्ण गुरुङ, संघीय लोकतान्त्रिक राष्ट्रिय मञ्चका श्रीप्रसाद लिम्बूको जमानत जफत भएको छ भने उपाध्यक्षमा राप्रपाकी सम्झना खपतरीको पनि जमानत जफत भएको छ । छथर जोरपाटी गाउँपालिकामा ७ जना वडाअध्यक्ष, २ जना महिला सदस्य र १ जना खुल्ला सदस्यका उम्मेदवारको जमानत जफत भएको निर्वाचन कार्यालयले जनाएको छ ।
