धरान । वैसाख ३० गते हुने स्थानीय तहको निर्वाचनलाई चाहिने सामाग्री जिल्ला निर्वाचन कार्यालय सुनसरीले मातहतमा रहेका मतदान केन्द्रमा पठाएको छ ।
निर्वाचन कार्यालयले धरान उपमहानगरपालिका, बराहक्षेत्र नगरपालिका, वर्जु गाउँपालिका, हरिनगरा र देवानगञ्जका निर्वाचन अधिकृतको कार्यालयलाई चाहिने सामाग्री पठाएको हो । निर्वाचन कार्यालयका सूचना अधिकारी अजय मिश्रका अनुसार निर्वाचनमा चाहिने सामाग्री मतपेटिका, निर्वाचन सम्पन्न गर्नका लागि आवश्यक अनुसूचीहरू, मतदाता नामावलीहरु, स्वस्तिक छाप लगायतका ५८ प्रकारको सामाग्री रहेको छ ।
सुनसरीका १२ पालिका मध्ये सोमबार पहिलो चरणमा ५ पालिकाका लागि सामाग्री वितरण गरिएको हो भने बाँकी पालिकाहरूलाई मंगलबार सम्ममा वितरण गरी सक्ने जिल्ला निर्वाचन कार्यालय सुनसरीले जनाएको छ । कार्यालयका सूचना अधिकारी मिश्रले भने, ‘निर्वाचन नजिकिदै छ, सुनसरीमा रहेका पालिकामा निर्वाचन व्यवस्थित बनाउन मतदान केन्द्रको सुरक्षा, आवश्यक सामाग्री लगायतका तयारी गर्ने काम भइरहेको छ, निर्वाचनलाई व्यवस्थित, भयरहित ढंगले गराउन कार्यालय लागि परेको छ ।’