मतदान स्थलको सुरक्षामा तिन तहको घेरा

धरान । वैशाख ३० गते हुने स्थानीय तहको निर्वाचनमा मतदात स्थलको सुरक्षाका लागि तिन तहको सुरक्षा घेरा रहने जिल्ला प्रशासन कार्यालयले जनाएको छ ।

सुनसरीमा निर्वाचनलाई शान्तिपुर्ण ढंगले सम्पन्न गराउन तिन तहको सुरक्षा घेरा रहने प्रशासनले जनाएको छ । प्रशासनका अनुसार निर्वाचन स्थलमा म्यादी प्रहरी, नेपाल प्रहरी, शसस्त्र प्रहरी रहने भएका छन् भने मतदान स्थलको बाहिरी घेरामा नेपाल सेनाले सुरक्षा दिने भएको छ । प्रशासनको अनुसार सुचना संकलनको लागि अनुसन्धानको जनशक्ति पनि परिचालन हुने जनाएको छ ।

स्थानीय तहको सुरक्षाका लागि जिल्लाको दुई उपमहानगरपालिकामा ३ वटा टोलि, नगरपालिका र गाउँपालिकामा २ टोलि सहित जिल्लामा कुनै आकस्मीक प्रहार रोक्नका लागि ६ वटा टोलि परिचालन गरिने बताएको छ । गणमा छुट्टै रिजर्भ टोलि पनि रहेको जनाएको छ ।

प्रशासनको अनुसार सुनसरीमा ३ सय ३० जना सेना सहित १ हजार १ सय ६६, सशस्त्र प्रहरी ५ सय १२, सुचना संकलक १९ जना र म्यादी प्रहरी २ हजार ६८ जना सहित ४ हजार ९५ जना सुरक्षाकर्मी परिचालन गरिने भएको छ । जिल्ला प्रहरी कार्यालय सुनसरीका प्रमुख एसपी सञ्जयसिंह थापाका अनुसार सुनसरी जिल्लाका १ सय ६६ मतदान स्थल मध्ये ४४ अतिसंवेदनशिल, ८० संवेदनशील र ४२ सामान्यको सुचीमा रहेको आधारमा सुरक्षा चुनौती रहेका मतदान स्थलमा अवस्था हेरेर सुरक्षाकर्मी परिचालन हुनेछन् ।

निर्वाचन कार्यालय सुनसरीका अनुसार जिल्लामा कुल ५ लाख ३४ हजार ७ सय ६५ मतदाता रहेका छन् । जिल्लामा महिलाको संख्या २ लाख ६५ हजार ६ सय १७ र पुरुष २ लाख ६९ हजार १ सय ४६ जना रहेका छन् । जिल्लामा १ सय ६६ मतदान स्थल रहेका छन् भने मतदात केन्द्र ५ सय ८१ रहेको छ ।

सुरक्षाका चुनौतीसँगै व्यवस्थापकीय चुनौतीलाई आकलन गरेर भयरहित वातावरणमा निर्वाचन सम्पन्न गर्न जिल्ला स्तरीय सुरक्षा एकीकृत गरी जोखिम र अतिसंवेदनशिल, संवेदनशील सुचीमा परेका मतदान स्थलहरूको अवस्था हेरेर संयुक्त सुरक्षाकर्मी परिचालन हुने प्रहरी प्रमुख थापाले बताए ।