धरान । कोरोना महामारीको जोखिम कम हुँदै गए पछि वैदेशिक रोजगारीमा जान श्रम स्वीकृति लिनेको संख्या बढ्दै गएको छ । वैदेशिक रोजगार विभागका अनुसार कोरोना महामारीका कारण दुई वर्षयता वैदेशिक रोजगारीमा आएको संकट हट्दै गएपछि विदेशिने नेपालीको संख्या बढ्दै गएको हो ।
वैदेशिक रोजगार विभागका अनुसार माघ महिनामा मात्र ५४ हजार ४ सय ७० जनाले श्रम स्वीकृति लिएको देखिएको छ । जसमध्ये ५० हजार ५ सय ३० जना पुरुष रहेका छन् भने तीन हजार ९ सय ४० जना महिला रहेका छन् । गत पुस महिनामा ६६ हजार ६ सय २५ जनाले वैदेशिक रोजगारीमा जानका लागि श्रम स्वीकृति लिएका थिए । चालू आवको साउन महिनामा २५ हजार ४ सय २८ जना, भदौमा ३६ हजार ४०, असोजमा ३९ हजार ६ सय ७१, कार्तिकमा ५४ हजार ९ सय १८ र मंसिरमा ७४ हजार ३ सय ५४ जनाले श्रम स्वीकृति लिएका थिए ।
अहिले पनि खाडी मुलुक कतार, साउदी अरेबिया र युएईमा जाने नेपालीको संख्या धेरै छ । कुवेत र ओमानलगायतका देशमा पनि नेपाली गइरहेका छन् । वैदेशिक रोजगार विभागले उपलब्ध गराएको तथ्यांक अनुसार ५४ हजार ४ सय ७० जना मध्ये २८ हजार ३ सय २१ जना अदक्ष जनशक्ती रहेका छन् । जसमध्ये पुरुष २६ हजार ३ सय ३७ छन् भने महिला एक हजार ९ सय ८४ जना रहेका छन् । पछिल्लो समय भिजिट भिसामा विदेश जानेको संख्या बढ्दै गएको छ ।
अध्यागमन विभागका अनुसार सन् २०२० मा ३७ हजार ६ सय ८४ जना भिजिट भिसामा विदेश गएका थिए । सन् २०२१ मा ९० हजार ८ सय ८३ जना भिजिट भिसामा विदेश गएका छन् । यस्तै सन् २०२२ मा हालसम्म १४ हजार ८ सय २४ जना भिजिट भिसामा विदेश गएका छन् ।
