सुनसरी/ मोबाइल बिक्री गर्ने पसलभित्र तासको खाल जमाएर बसेका १० जनालाई प्रहरीले पक्राउ गरेको छ ।
मोरङको उर्लाबारी नगरपालिका–७ मा सञ्चालित मोबाइल जोन पसलबाट उनीहरू मंगलबार राति पक्राउ परेका हुन् ।
डिक खड्कीको घरमा रहेको उक्त पसलभित्र जुवातास भइरहेको सूचना पाएपछि इलाका प्रहरी कार्यालय उर्लाबारीबाट खटिएको टोलीले राति करिब ११ः३० बजेतिर छापा मारेको थियो ।
प्रहरी निरीक्षक नवीन वलीको नेतृत्वमा पुगेको टोलीले छापा हानेर तास खेलिरहेको अवस्थामा १० जनालाई नियन्त्रणमा लिएको हो ।
प्रहरीले पक्राउ परेकाको साथबाट पाँच बुङ तास र १२ हजार ६२२ रुपैयाँ नगद बरामद गरेको छ ।
पक्राउ पर्नेमा उर्लाबारी नगरपालिका–७ का जलन ठटाल, सुभाष शर्मा र रोशन शर्मा छन् । त्यस्तै वडा नम्बर ८ का सुमन ढकाल, निरोज धिमाल, कमल ढुंगाना र किरण ढुंगाना पनि पक्राउ परेका छन् ।
यसैगरी झापाको दमक नगरपालिका–७ का विनोद ढकाल, वडा नम्बर ५ का दीपक चौधरी र मोबाइल जोनका सञ्चालक रतुवामाई नगरपालिका–९ का विवेक बराललाई पनि प्रहरीले नियन्त्रणमा लिएको छ
पक्राउ परेका सबैलाई इलाका प्रहरी कार्यालय उर्लाबारीमा राखेर थप अनुसन्धान अघि बढाइएको मोरङ प्रहरीका सूचना अधिकारी डीएसपी मकेन्द्रकुमार मिश्रले जानकारी दिए ।
