_1693980289.gif "#")
धरान । नेपाली कांग्रेस धरान उपमहानगर समितिले पार्टीलाई जनस्तरमा बलियो बनाउन वडास्तरमा पार्टीको संगठन विस्तार गर्न सक्रियता बढाएको छ ।
सभापति श्याम पोख्रेलले दुई साता अघिदेखि वडास्तरमा पार्टीको संगठन विस्तार गर्न थालिएको जानकारी दिए । मङ्गलबार नगर सभापति पोख्रेलकै प्रमुख आतिथ्यतामा धरान वडा नं. ८ का सहीद रत्नमार्ग, बम्जन टोल र बरपीपल चौकमा संगठन बिस्तार गरेको हो । कांग्रेसले अन्तरक्रियासँगै धरानको सबै वडामा पार्टीका टोल कमिटी बिस्तार गर्दै जाने र जनस्तरमा जनताका समस्या, गुनासा बुझ्दै बिकास निर्माण कार्यमा सक्रियता बढाउने जनाएको छ ।
कांग्रेस धरान उपमहानगर समितिका सचिव हिमाल श्रेष्ठले उपमहानगरपालिका अन्तर्गतका २० वटै वडाका विभिन्न टोलहरुमा टोल कमिटी गठन गर्दै पार्टीको संगठन बिस्तार गरिने बताए । उनका अनुसार हालसम्म वडा नं. ५, ८ र १५ मा टोल कमिटी विस्तार अभियान सम्पन्न भएको छ । उनले फागुन मसान्तभित्र धरानमा टोल कमिटी विस्तार गरिसक्ने बताए । पार्टीलाई जनस्तरमा बलियो तथा मजबुत बनाउन नेपाली कांग्रेस धरानले सक्रियता बढाएको उनले जानकारी दिए ।
साथै, सचिव श्रेष्ठले आउँदै गरेको निर्वाचनमा पार्टीलाई सफल बनाउनका निम्ति टोल टोलमा पुगेर संगठन विस्तार गर्न थालिएको बताए ।
