बीपीका २ सय १६ स्वास्थ्यकर्मी संक्रमित

धरान/  बीपी कोइराला स्वास्थ्य विज्ञान प्रतिष्ठान धरानमा अहिले सम्म २ सय १६ जना स्वास्थ्यकर्मी कोरोना संक्रमित भएका छन् ।

प्रतिष्ठानका डेपुटी अस्पताल निर्देशक डा. विकास साहले दिएको जानकारी अनुसार बिहीबार, शुक्रवार र शनिवार गरी अहिले सम्म एनेस्थेसिया, सर्जरी, मेडिसिन, डर्मा, इएनटी, आई, अर्थाेपेडिक, पिडियाट्रिक, गाईनो, साईकेटिक, इमरजेन्सी र प्याथोलोजी विभागका ८१ जना डाक्टरमा कोरोना संक्रमण पुष्टि भएको छ । त्यसै गरी नर्स १ सय १४ जना, हेल्पर १६ जना र हेल्थ एडका ५ जना गरी जम्मा २ सय १६ जनामा कोरोना संक्रमण भएको छ ।

धेरै स्वास्थ्यकर्मी कोरोना संक्रमित भए पनि प्रतिष्ठानले आफूले दिने सेवा प्रवाह गरिरहेको डेपुटी अस्पताल निर्देशक डा. साहले बताए । उनका अनुसार केही शल्यक्रिया गर्ने डाक्टर नै संक्रमित हुन पुगेका छन् । अस्पतालमा कम जनशक्तिले सेवा प्रवाह गरी रहेकाले प्रतिष्ठानमा उपचारमा आउने सर्वसाधारणलाई टेलिफोन लगायतबाटै घरैबाट स्वास्थ्य परामर्श लिन डा. साहले आग्रह गरेका छन् ।