_1693980289.gif "#")
धरान/ धरान-१२, चतरा लाइनमा रहेको सुनाखरी एकेडेमीले शुक्रबार आफ्ना विद्यार्थीहरूलाई प्रतिवेदन लेखनसम्बन्धी प्रशिक्षण दिएको छ ।
सो प्रशिक्षण कार्यक्रममा सुनाखरीमा कक्षा ११ मा अध्ययनरत विद्यार्थीहरू सहभागी थिए । उनीहरूलाई उपप्राध्यापक एवम् पत्रकार राजेश विद्रोहीले प्रशिक्षण दिएका हुन् । प्रशिक्षणमा सहभागी विद्यार्थीहरूलाई शनिबार कुनै कृषि फर्ममा अवलोकन भ्रमणमा लगिने र त्यसै भ्रमणसम्बन्धी प्रतिवेदन लेख्न लगाइने विद्यालयका प्राचार्य मिलन राईले बताए । प्रतिवेदन लेखनसम्बन्धी प्रयोगात्मक ज्ञान दिँदै विद्यार्थीहरूलाई पाठ्यक्रम बाहिरका विषयमा पनि जानकारी दिने उद्देश्यले कार्यक्रम आयोजना गरिएको प्राचार्य राईको भनाइ छ ।
विद्यार्थीहरू अनुशासित र जिज्ञासु रहेको प्रशिक्षक विद्रोहीले बताए । यस्ता कार्यक्रमले विद्यार्थीलाई रचनात्मक बनाउने उनको धारणा छ । “विद्यालयको काम अनुकरणीय र प्रशंसनीय छ ।” विद्रोहीले भने ।
कार्यक्रममा सहभागी विद्यार्थीहरूले पनि कार्यक्रम फलदायी भएको धारणा व्यक्त गरे । तीर्थ कार्कीले सञ्चालन गरेको कार्यक्रमको समापनमा बोल्दै सुनाखरीका प्लस टूका संयोजक टपकुमार राईले यस्ता रचनात्मक कार्यक्रम आगामी दिनमा पनि आयोजना गरिने बताए । कार्यक्रममा विद्यालयका निर्देशक प्रदीप राई पनि उपस्थित थिए ।
आफ्नो अनुभव प्रस्तुत गर्दै विद्यार्थीहरू रोदन राई, सुष्मा जिमी, सुजन लिम्बू र सुदा सम्वाहाम्फेले प्रशिक्षणबाट प्रतिवेदन लेखनबारे धेरै जानकारी प्राप्त भएको बताए ।
