धरान । धरान मेघा कलेज (हिमालयन +२) मा कक्षा–११ मा अध्ययनरत् नवआगन्तुक बिद्यार्थीहरूलाई शनिबार स्वागत गरिएको छ ।
कलेजमा बीबीएसमा अध्ययनरत् विद्यार्थीहरूले अबिर लगाइदिँदै खदा ओढाएर उनीहरूलाई स्वागत गरेका थिए । स्वागत कार्यक्रमका प्रमुख अतिथि एवम् हिसान सुनसरीका अध्यक्ष मुकुन्द घिमिरेले विद्यार्थीहरूका प्रस्तुतिको प्रशंसा गर्दै उनीहरूलाई पठनपाठनका साथै अतिरिक्त क्रियाकलापमा पनि अब्बल स्थान प्राप्त गर्न शुभकामना दिए । आजका विद्यार्थीहरूले नै भविष्यमा देशको हरेक क्षेत्रको नेतृत्व गर्ने भएकाले विद्यार्थीहरू अनुशासित र लगनशील हुनुपर्ने उनको धारणा थियो ।
हिसान सुनसरीले आयोजना गरेको बास्केटबल प्रतियोगितामा दोस्रो स्थान प्राप्त गरेका हिमालयनका विद्यार्थीहरूलाई पनि सो अवसरमा सम्मान गरिएको थियो । स्थापनाको पहिलो वर्षमै जिल्लाव्यापी प्रतियोगितामा दोस्रो स्थान प्राप्त गर्नु उल्लेखनीय उपलब्धि भएको बताउँदै प्रमुख अतिथि घिमिरेले खुसी व्यक्त गरे ।
कार्यक्रममा गायिका अम्बिका दुवाडी र युवागायक भक्तिराज राईले गीत प्रस्तुत गरे । कार्यक्रममा विद्यार्थीहरूले पनि आकर्षक नृत्यका साथै गीतहरू प्रस्तुत गरे । हिमालयन विद्यालयमा अहिले भोजपुर, सङ्खुवासभा, धनकुटा, तेह्रथुम, ताप्लेजुङ, पाँचथर, इलाम, झापा, मोरङ, सुनसरी, उदयपुरलगायत प्रदेश १ का विभिन्न स्थानबाट आएका साढे तीन सयभन्दा बढी विद्यार्थी कक्षा–११ रहेको शैक्षिक निर्देशक अर्जुन घिमिरेले बताए । नवआगन्तुक विद्यार्थीहरूलाई स्वागत गर्ने परम्परा कायम राख्न र नयाँ प्रतिभाहरूलाई मञ्च प्रदान गर्न कार्यक्रम आयोजना गरिएको कलेजका शैक्षिक निर्देशक घिमिरेले जनाए ।
कार्यक्रममा कार्यक्रममा कलेजका प्राचार्य भास्कर पौडेल, कलेजका बीबीएस संयोजक चन्द्र वनेम, होटल म्यानेजमेन्ट कोअर्डिनेटर पोषण श्रेष्ठ, शेयर सदस्यहरू सागर खड्का, प्रभास राजवंशी, जीवन न्यौपाने, दीपेन्द्र यादव, आलोक श्रेष्ठलगायत उपस्थित थिए । एन–प्याब्सन धरानका अध्यक्ष भगत लिम्बू, प्याब्सन धरानका अध्यक्ष राजकुमार लिम्बू, नोबेल एकेडेमीका प्रिन्सिपल रविन न्यौपानेलगायत पनि कार्यक्रममा उपस्थित थिए ।
कलेजका अध्यक्ष कैलाश लिम्बूको अध्यक्षतामा सम्पन्न कार्यक्रममा शेयर सदस्य दीपक घिमिरेले स्वागत मन्तव्य राखेका थिए । सोही कलेजकी बीबीएस तेस्रो वर्षकी छात्रा आरती बस्नेतले सञ्चालन गरेको कार्यक्रममा विद्यार्थीका तर्पmबाट मिस स्टेट विजेता छात्रा श्वेता भुजेलले नवआगन्तुक विद्यार्थीहरूलाई स्वागत गरेकी थिइन् ।